اسلام آباد (نیوز ڈیسک)لانگ مارچ کے معاملے پر حکومت اور پی ٹی آئی کے درمیان رابطے جاری ہیں،
حکومت نے درمیانی راستہ نکالنے کی کوششیں تیز کردی ہیں تاہم پی ٹی آئی مارچ مؤخر کرنے پر آمادہ نہیں۔حکومتی ذرائع کے مطابق وفاق کی ایک اہم شخصیت نے پی ٹی آئی چیئرمین بیرسٹر گوہر علی خان اور مجلس وحدت مسلمین کے سربراہ علامہ راجہ ناصر عباس سے رابطہ کیا ہے۔ ان رابطوں کا مقصد ممکنہ کشیدگی سے بچنے کے لیے فریقین کے درمیان کوئی قابلِ قبول راستہ تلاش کرنا ہے۔ذرائع کا کہنا ہے کہ حکومت کی جانب سے پی ٹی آئی قیادت کو مارچ کے حوالے سے اپنی حدود سے بھی آگاہ کردیا گیا ہے اور واضح کیا گیا ہے کہ انتظامیہ جہاں مارچ کو روکنے کا فیصلہ کرے گی، وہاں مظاہرین کو پرامن طور پر موجود رہنا ہوگا۔
حکومتی ذرائع کے مطابق موجودہ صورتحال میں تصادم سے گریز اور معاملات کو بات چیت کے ذریعے حل کرنے کے لیے رابطوں کا سلسلہ برقرار رکھا جائے گا۔دوسری جانب پی ٹی آئی ذرائع کا کہنا ہے کہ پارٹی قیادت پر کارکنوں کی جانب سے مارچ جاری رکھنے کا شدید دباؤ ہے، جس کے باعث قیادت فی الحال لانگ مارچ مؤخر کرنے کے لیے تیار نہیں۔ذرائع کے مطابق لانگ مارچ کے دوران بھی حکومت اور پی ٹی آئی کے درمیان مذاکرات اور رابطوں کا امکان موجود ہے، جبکہ دونوں جانب سے صورتحال کو مزید کشیدہ ہونے سے روکنے کے لیے درمیانی راستہ تلاش کرنے کی کوشش کی جائے گی۔
