اسلام آباد (مانیٹرنگ ڈیسک) نجی یونیورسٹی کی طالبہ نے سوال کرتے ہوئے کہاکہ عمران خان اپنی بیوی نہیں سنبھال سکے ملک کیسے سنبھالیں گے، تفصیلات کے مطابق ایک نجی ٹی وی چینل کے پروگرام میں تحریک انصاف کے رہنما محمود الرشید ایک نجی یونیورسٹی کی طالبات کے سوالات کا جواب دے رہے تھے کہ اس دوران ایک طالبہ نے ان سے سوال کیا کہ عمران خان نے دھرنے میں لوگوں سے کہا تھا کہ میں شادی تب کروں گا جب میرا دھرنا ختم ہو جائے گا لیکن جب ملک میں دھماکہ ہوا تو عمران خان نے شادی کر لی مگر وہ اپنی بیوی نہیں
سنبھال سکے تو وہ مستقبل میں ملک کو کیسے چلا سکیں گے۔ تحریک انصاف کے رہنما محمود الرشید نے جواب میں کہا کہ قائداعظم کی ازدواجی زندگی بھی کامیاب نہیں رہی تو ہم یہ کیسے کہہ سکتے ہیں کہ مستقبل میں عمران خان ملک کو نہیں سنبھال سکیں گے کسی بھی سیاستدان کو آگے لانے کے لیے اس کے ماضی کو دیکھا جاتا ہے اور عمران خان کا ماضی ایک شاندار ماضی ہے جنہوں نے کرکٹ ورلڈ کپ پاکستان کو دلایا اس کے علاوہ انہوں نے لاہور، پشاور اور کراچی میں کینسر ہسپتالوں کا آغاز کیا تعلیمی میدان میں نمل یونیورسٹی کو متعارف کرایا۔
