شیخوپورہ(این این آئی)شیخوپورہ میں فیصل آباد روڈ پر 2منزلہ عمارت گر گئی جس کے نتیجے میں ایک ہی خاندان کے 4 افراد جاں بحق اور 11افراد زخمی ہوگئے۔منگل کو شیخوپورہ میں فیصل آباد روڈ کی آبادی فیروز وٹواں میں واقعہ پیش آیا،جہاں6ماہ قبل تعمیر کی جانے والی ڈیڈھ کینال رقبہ پر مشتمل ڈبل اسٹوری بلڈنگ اچانک زمین بوس ہوگئی۔ذرائع کے مطابق ،فیروز وٹواں میں واقعہ ڈبل اسٹوری بلڈنگ کے ساتھ ایک تہہ خانہ کی تعمیر کا کام جاری تھا،جس کے باعث اس عمارت کی بنیادیں کمزور ہوگئیں
اور وہ گرگئی۔روشنی کا بندوبست نہ ہونے کی وجہ سے امدادی کارروائیوں میں مشکلات کا سامنا رہا۔ریسکیو اہلکاروں نے 6افراد کو ملبے سے زندہ نکال لیا جن کو ڈسٹرکٹ ہیڈکوارٹر ہسپتال منتقل کردیا گیا جبکہ جاں بحق افراد میں 2سگے بھائیوں سمیت ایک ہی خاندان کے 4افراد شامل ہیں۔ریسکیو کے کام میں ڈبل ون ڈبل ٹو کے اہلکاروں اور مقامی افراد نے حصہ لیا۔
