اسلام آباد (نیوز ڈیسک) پی ٹی اے نے انتہاءپسندی اور دہشت گردی کو فروغ دینے کے الزام میں 25 سے زائد ویب سائٹس بند کر دی ہیں۔ نجی ٹی وی کے مطابق نیشنل ایکشن پلان کے تحت انتہاءپسندی پھیلانے والی 25 سے زائد ویب سائٹس پر پابندی عائد کرنے کا فیصلہ کیا گیا تھا۔ اس سلسلے میں سی ٹی ڈی نے ویب سائٹس بند کرنے کے لئے پی ٹی اے حکام کو خط ارسال کیا جس پر کارروائی کرتے ہوئے حکام نے نشاندہی کی گئی ویب سائٹس کو بند کر دیا۔
حکام کا کہنا ہے کہ ویب سائٹس اور سوشل میڈیا آئی ڈیز کے ذریعے دہشت گردی کو فروغ دیا جاتا ہے جب کہ دہشت گرد اپنی کارروائیوں کی تصاویر اور ویڈیوز کو بھی انٹرنیٹ پر اپ لوڈ کرتے ہیں۔ سی ٹی ڈی پولیس نے بتایا کہ کالعدم تنظیم کے دہشت گرد حملوں کی ذمہ داری بھی ویب سائٹس کے ذریعے ہی قبول کرتے ہیں۔ ایڈیشنل آئی جی ثناءاللہ عباسی نے میڈیا سے گفتگو کرتے ہوئے بتایا کہ ان میں سے بعض ویب سائٹس کا تعلق کالعدم تنظیموں سے تھا اور کچھ انتہاءپسندی کو فروغ دے رہی تھیں۔
