گوجرانوالہ (این این آئی)تھانہ صدر گوجرانوالہ پولیس کے مبینہ مقابلے میں اسپیشل چائلڈ 8 سالہ بچی کو اسکول پک اینڈ ڈراپ کے دوران متعدد بار جنسی درندگی کا نشانہ بنانے والا رکشہ ڈرائیور اپنے ہی ساتھی کی فائرنگ سے ہلاک ہوگیا۔

پولیس کے مطابق معصوم بچی کو متعدد بار جنسی زیادتی کا نشانہ بنانے کے مقدمے میں ملوث اور مطلوب ملزم رشید نامعلوم ساتھی کے ہمراہ پولیس پارٹی پر اندھا دھند فائرنگ کرکے فرار ہونے کی کوشش کر رہا تھا کہ اپنے ہی ساتھی کی فائرنگ سے ہلاک ہوگیا۔پولیس کے مطابق ہلاک ملزم بچی کو اسکول لے جانے اور واپس چھوڑنے کے دوران متعدد بار زیادتی کا نشانہ بنا چکا تھا۔ ملزم کے قبضے سے ناجائز اسلحہ اور موٹر سائیکل چاند گاڑی برآمد ہوئی، جبکہ اس کا ساتھی فرار ہوگیا۔سی پی او ڈاکٹر سردار غیاث گل خان نے واقعے کا فوری نوٹس لیتے ہوئے ڈویژنل ایس پی سے رپورٹ طلب کرلی۔ فرار ملزم کی گرفتاری کے لیے ایس ڈی پی او پیپلز کالونی کی زیرنگرانی خصوصی پولیس ٹیمیں تشکیل دے دی گئی ہیں

جبکہ شہر بھر میں ناکہ بندی جاری ہے۔سی پی او ڈاکٹر سردار غیاث گل خان نے کہا کہ خواتین اور بچوں کے خلاف جرائم میں ملوث عناصر سے کوئی رعایت نہیں، جرائم پیشہ عناصر کی بیخ کنی ناگزیر ہے۔