اسلام آباد (نیوز ڈیسک) پیٹرولیم مصنوعات کی قیمتوں میں اضافے کے اثرات کم کرنے کے لیے وفاقی حکومت نے کم آمدن والے شہریوں کے لیے وزیراعظم فیول ریلیف پیکیج کی منظوری دے دی ہے۔

اقتصادی رابطہ کمیٹی (ای سی سی) نے موٹر سائیکل، رکشہ اور چھوٹی گاڑیوں کے غیر کمرشل صارفین کو مالی ریلیف دینے کی منظوری دی۔وفاقی وزیر خزانہ محمد اورنگزیب کی صدارت میں ہونے والے ای سی سی اجلاس میں پیکیج سے متعلق اہم فیصلے کیے گئے۔ حکومتی اعلامیے کے مطابق موٹر سائیکل اور رکشہ استعمال کرنے والوں کو ہر ہفتے 500 روپے فیول ریلیف فراہم کیا جائے گا۔اس کے علاوہ 800 سی سی تک کی غیر کمرشل گاڑیوں کے مالکان بھی اس اسکیم سے مستفید ہوسکیں گے۔ ایسے صارفین کو ہر 10 دن کے بعد 1000 روپے کا فیول ریلیف دیا جائے گا۔حکومت نے مذکورہ اسکیم کے لیے 75 ارب روپے کی ٹیکنیکل سپلیمنٹری گرانٹ بھی منظور کرلی ہے۔ حکام کے مطابق پیکیج کا بنیادی مقصد پیٹرول کی بڑھتی ہوئی قیمتوں سے کم آمدن رکھنے والے افراد پر پڑنے والے مالی دباؤ کو کم کرنا ہے۔اعلامیے کے مطابق فیول ریلیف کی سہولت صرف غیر کمرشل صارفین تک محدود رہے گی،

جبکہ ایک صارف ایک ہی گاڑی کے لیے اس امداد کا حقدار ہوگا۔ اس شرط کا مقصد حکومتی ریلیف کو زیادہ سے زیادہ اہل افراد تک پہنچانا ہے۔فیول ریلیف کی رقم کی تقسیم کو شفاف بنانے کے لیے ڈیجیٹل فیول پاس سسٹم بھی متعارف کرایا جائے گا۔ اس نظام کی تیاری اور انتظام کی ذمہ داری وزارتِ آئی ٹی کو سونپی گئی ہے۔حکومت کے مطابق نئے پیکیج کے ذریعے موٹر سائیکل اور رکشہ صارفین کے ساتھ ساتھ چھوٹی غیر کمرشل گاڑیوں کے مالکان کو مقررہ مدت کے تحت مالی معاونت فراہم کی جائے گی تاکہ پیٹرولیم مصنوعات کی قیمتوں میں اضافے کے اثرات کو کسی حد تک کم کیا جاسکے۔