اسلام آباد (نیوز ڈیسک): اسٹیٹ بینک آف پاکستان نے بینکاری شعبے سے وابستہ ملازمین کے لیے ’وزیراعظم اپنا گھر پروگرام‘ کے تحت رعایتی ہاؤسنگ فنانسنگ حاصل کرنے پر پابندی عائد کردی ہے۔
مرکزی بینک کی جانب سے جاری نئی ہدایات میں واضح کیا گیا ہے کہ کمرشل بینکس، ڈویلپمنٹ فنانس انسٹی ٹیوشنز (DFIs) اور مائیکرو فنانس بینکس میں کام کرنے والے ملازمین اس حکومتی ہاؤسنگ اسکیم کے تحت قرض حاصل کرنے کے اہل نہیں ہوں گے۔
اسٹیٹ بینک کے نوٹیفکیشن میں ملازمین کی اہلیت سے متعلق موجود ابہام کو دور کرتے ہوئے واضح کردیا گیا ہے کہ مالیاتی اداروں کے اپنے اسٹاف کو ’میرا گھر اپنا گھر‘ سمیت وزیراعظم کی ہاؤسنگ فنانسنگ اسکیم سے مستثنیٰ رکھا گیا ہے۔
مرکزی بینک نے تمام متعلقہ بینکوں کی انتظامیہ کو ہدایت کی ہے کہ وہ اپنے ملازمین کو اس فیصلے اور اسکیم کے لیے مقررہ اہلیت کے بارے میں فوری طور پر آگاہ کریں۔
اسٹیٹ بینک کے مطابق اس اقدام کا مقصد ہاؤسنگ فنانسنگ کی سہولت کو ان شہریوں تک محدود رکھنا ہے جو اسکیم کے مقررہ معیار پر پورا اترتے ہوں، تاکہ حکومتی پروگرام کے فوائد مطلوبہ افراد تک پہنچ سکیں۔
