لاہور(نیوزڈیسک) وزیراعلیٰ پنجاب محمد شہبازشریف سے آج یہاں خیبرپختونخوا کے گورنر اقبال ظفر جھگڑا نے ملاقات کی،جس میں باہمی دلچسپی کے اموراور بین الصوبائی ہم آہنگی کے فروغ کے حوالے سے تبادلہ خیال کیا گیا۔ وزیر اعلیٰ نے اس موقع پر گفتگو کرتے ہوئے کہا کہ وزیراعظم محمد نوازشریف کی قیادت میں پاکستان تیزی سے آگے بڑھ رہاہے اور 2013ء کی نسبت آج پاکستان زیادہ ترقی یافتہ ،خوشحال ،پرامن او

رروشن ہے۔ وزیر اعلیٰ نے کہا کہ پاکستان ہم سب کا ہے اور اس کی ترقی کے لئے سب کو ملکر کام کرناہے۔چاروں صوبے یکساں رفتار کے ساتھ ترقی کریں گے تو پاکستان ترقی کرے گا۔انہوں نے کہا کہ ضد اور ذاتی انا کی منفی سیاست پاکستان کیلئے نقصان دہ ہے۔ پاکستان کی ترقی اور خوشحالی کے لئے ’’ہم ‘‘کے راستے پر چلنا وقت کی ضرورت ہے۔وزیر اعلیٰ نے کہا کہ خیبرپختونخوا میں بسنے والے شہری ہمارے بھائی ہیں اورپنجاب حکومت نے اپنے تعلیمی پروگراموں میں کے پی کے اور دیگر صوبوں کے ذہین طلبا و طالبات کو شامل کیا ہے۔حکومت پنجاب کے اس اقدام سے قومی یکجہتی، بھائی چارے، یگانگت اور بین الصوبائی ہم آہنگی کو فروغ مل رہا ہے۔انہوں نے کہا کہ وزیراعظم نوازشریف کی قیادت میں ترقی اور خوشحالی کے سفر کو مزید تیزی سے آگے بڑھائیں گے۔ اس موقع پر گورنر کے پی کے اقبال ظفر جھگڑا نے بات چیت کرتے ہوئے کہا کہ وزیراعلی شہبازشریف کی غیرمعمولی کارکردگی دیگر صوبوں کے لئے رول ماڈل ہے اور شہبازشریف نے عوام کی خدمت کے نئے ریکارڈ قائم کئے ہیں۔انہوں نے کہا کہ منصوبوں میں شفافیت کے ذریعے اربوں روپے کے قومی وسائل بچانے کا کریڈٹ مسلم لیگ(ن) کی قیادت کو جاتاہے۔شہبازشریف نے جس تیزی سے منصوبوں کومکمل کیا ہے وہ اپنی مثال آپ ہیں۔