اسلام آباد(نیوز ڈیسک)سینیٹ نے شفافیت کو یقینی بنانے اور اردو زبان کو دفتری زبان بنانے کے حوالے سے جامع اصلاحات لانے کیلیے انتہائی اہم فیصلے کرلیے۔باوثوق ذرائع کے مطابق سینیٹ کی نئی ویب سائٹ کا افتتاح آئندہ دو روز میں کیا جائیگا۔ نئی ویب سائٹ میں اراکین سینٹ کی نہ صرف اجلاس میں حاضری بلکہ قائمہ کمیٹی میں حاضری کوبھی آویزاں کیا جائیگا جبکہ سینیٹ کے اراکین کو ملنے والی تنخواہ ومراعات بھی ویب سائٹ پر آویزاں کی جائیں گی۔ اس کے علاوہ سینیٹ سیکرٹریٹ کے اہم اخراجات کو بھی پبلک کیاجائیگا تاکہ شفافیت کو یقینی بنایا جا سکے۔ذرائع کے مطابق سینیٹ نے باقی وزارتوں کی طرح سینیٹ میں بھی اردو زبان کو مزید فروغ دینے کیلئے اہم فیصلے کئے ہیں جن میں قانون سازی کا اردو میں ترجمہ ، نوٹیفکیشن بھی اردو میں جاری کرنیکا فیصلہ شامل ہے جبکہ آئندہ ترجمے کیلیے ہونیوالی بھرتیوں میں قانون سے آگاہی رکھنے والے امیدواروں خصوصاً ایل ایل بی کی ڈگری رکھنے والے کو اہمیت دی جائیگی۔