سیول(این این آئی)شمالی کوریا نے اپنے حالیہ میزائل تجربوں پر خاموشی توڑتے ہوئے کہا ہے کہ درمیانے فاصلے تک مار کرنے والے میزائل تجربے جوہری مشقوں کا حصہ تھے۔غیرملکی خبر ایجنسی کے مطابق شمالی کوریا کی فوجی مشقیں 25 ستمبر سے 9 اکتوبر تک جاری رہیں۔
مشقوں کی نگرانی شمالی کوریا کے رہنما کم جونگ ان نے کی۔شمالی کوریا کی خبر ایجنسی کا کہنا ہے کہ جوہری میزائل تجربے امریکا اور جنوبی کوریا کی بحری افواج کی جانب سے کی گئی فوجی مشقوں کے ردعمل میں کیے گئے ہیں۔خبر ایجنسی کا کہنا ہے کہ کم جونگ ان نے گزشتہ دو ہفتوں سے جاری میزائل تجربوں کی ان مشقوں کی سربراہی کی۔ مشقوں کا مقصد دنیا تک جنگ کی روک تھام کا ایک مضبوط پیغام پہنچانا تھا۔مشقوں کے دوران فوجی تنصیبات اور اہم بندرگاہوں کو نشانہ بنانے کے ساتھ جنوب میں ہوائی اڈوں کو محفوظ رکھنے کے تجربات کیے گئے۔شمالی کوریا نے دو روز قبل بھی 2 بیلسٹک میزائل داغے تھے، جس پر جاپان اور جنوبی کوریا کے حکام کا کہنا تھا کہ 25 ستمبر سے اب تک شمالی کوریا نے 7 میزائل تجربے کیے ہیں۔شمالی کوریا کے رہنما کم جونگ ان نے کہا کہ فوجی مشقوں میں جوہری جنگی قوت کو بہتر بنانے اور عملی جنگی صلاحیت کا بھرپور مظاہرہ کیا گیا، میزائل کسی بھی مقام سے اپنے اہداف کو نشانہ بنانے اور اسے تباہ کرنے کے لیے پوری طرح تیار ہیں۔خبر ایجنسی کے مطابق شمالی کوریا کے صدر کا کہنا تھا کہ ہمارے دشمن مذاکرات کرنا چاہتے ہیں لیکن ہمارے پاس بات کرنے کو کچھ نہیں ہے اور نہ ہی ہم ایسا کرنے کی ضرورت محسوس کرتے ہیں۔
