بیجنگ(آن لائن ) چین کے صدر شی جن پنگ اور نیپال کی صدر بدیا دیوی بھنڈاری نے مشترکہ طور پر دنیا کی سب سے اونچی چوٹی ماوئنٹ ایورسٹ کی نئی بلندی کا اعلان کیا جو کہ 8848.86میٹر ہے اس حوالے سے خطوط کا تبادلہ کیا گیا۔ صدرشی جن پنگ نے اپنے خط میں نشاندہی کی
کہ ماونٹ ایورسٹ کی چوٹی چین اور نیپال کی روایتی دوستی کی اہم علامت ہے دونوں ممالک دنیا کی بلند ترین چوٹی کو چین نیپال دوستی کی چوٹی قراردیتے ہیں۔چین نیپال کے ساتھ مائونٹ ایورسٹ کے حیاتیاتی ماحول کے تحفظ اور سائنسی ریسرچ کو مزید فروغ دینے کا خواہشمند ہے تاکہ دونوں ملکوں کے عوام کے مشترکہ گھر کا بہتر انداز میں تحفظ کیا جاسکے۔شی جن پنگ نے پرزور الفاظ میں کہا کہ رواں سال چین اور نیپال کے درمیان سفارتی تعلقات کے قیام کی 65ویں سالگرہ منائی جارہی ہے مشترکہ کوششوں کے نتیجے میں دو طرفہ سیاسی اعتماد میں اضافہ ہوا ہے اور دی بیلٹ اینڈ روڈ کی تعمیر کو مزید آگے بڑھایا جارہا ہے۔چین اور نیپال کو مزید قریبی ہم نصیب معاشرے کی تعمیر کے لیے مشترکہ کوششوں کو مزید مضبوط بنانا چاہئیے تاکہ دونوں ملکوں کے عوام تک اس کے ثمرات کو منتقل کیا جاسکے۔ نئی پیمائش کے بعد ماؤنٹ ایورسٹ کی اونچائی 86 سینٹی میٹر ( ڈھائی فٹ سے زائد) اضافے کے بعد 8 ہزار 848 اعشاریہ 86 میٹر یعنی (29 ہزار 31 فٹ) ہوگئی ہے۔
