سرینگر(این این آئی)امریکی اخبار ’’ نیویارک ٹائمز‘‘ نے بھارتی دارلحکومت نئی دلی میں ہونے والے حالیہ مسلم کش فسادات سے متعلق اپنی ایک رپورٹ میں لکھا ہے کہ فسادات کے دوران پولیس نے بھی دانستہ طور پر مسلمانوںکو نشانہ بنایا۔ کشمیر میڈیا سروس کے مطابق نیویارک ٹائمز نے لکھا کہ شواہد اس بات کا پتہ دیتے ہیں کہ
مسلمانوں اور انکے گھروں کو نشانہ بنانے میں نئی دلی پولیس نے بھی کردار ادا کیااور متحرک طریقے سے ہندو ہجوم کی مدد کی۔ رپورٹ کے مطابق دلی پولیس کی کئی ویڈیوز منظر عام پر آئیں جن میں اسے مسلمانوں پر حملہ کرتے ہوئے دیکھاگیا۔ رپورٹ میں کہا کیا کہ نریندر مودی کی سربراہی میں قائم بھارتیہ جنتاپارٹی کی حکومت نے پولیس کو سیاست زدہ کر دیا ہے ۔ رپورٹ میں بھارتی پارلیمنٹ کے سابق رکن شاہد صدیقی کا حوالہ دیتے ہوئے لکھا گیا کہ بھارت کی پولیس انتہائی نوآبادیاتی ذہن اور ذات پات والی ہے ۔ شاہد صدیقی کا کہنا ہے کہ پولیس کا رویہ کمزور کی طرف ہمیشہ زیادہ تشدد اور غصے پر مبنی ہوتا ہے۔ یاد رہے کہ نئی دلی میں ہونے والے حالیہ فسادات میں پچاس کے لگ بھگ افراد مارے گئے تھے ۔ ہندو انتہا تنظیموں کے کارکنوں نے اس دوران مسلمانوں کے قتل عام کے علاوہ انکے گھروں، دکانوں اور دیگر املاک کو نذر آتش کر دیا تھا ۔ مساجد کی بھی بڑے پیمانے پر بے حرمتی کی گئی تھی۔
