سرینگر(این این آئی) مقبوضہ کشمیر میں بھارتی فوجیوں نے بدھ کوپلوامہ اور دیگر اضلاع میں محاصرے اور تلاشی کی بڑی کارروائیوں کے دوران بیسیوں نوجوان گرفتار کر لیے۔ کشمیر میڈیاسروس کے مطابق بھارتی فوجیوں نے زیادہ تر نوجوان ضلع پلوامہ کے علاقوں کریم آباد، سامبورہ، رتنی پورہ، راجپورہ، پامپور، ڈاڈسر، ترال اور متری گام میں گرفتار کیے۔ فوجیوں نے ان علاقوں کے تمام داخلی اور خارجی راستے سیل کر کے گھرگھر تلاشی کی کارروائی کی۔

قابض فوجی اہلکاروں کے ہاتھ جو بھی مرد لگا اسے انہوں نے گرفتار کرلیا جبکہ خواتین اور بچوں کو وحشیانہ تشدد کا نشانہ بنایا۔ گاندر بل، شوپیاں، کپواڑہ، بارھمولہ، بانڈی پورہ اور دیگر علاقوں سے بھی بڑی تعداد میں نوجوانوں کی گرفتاریوں کی اطلاعات ملی ہیں۔ دریں اثناکشمیریوں کے خلاف انتقامی کارروائیوں کے حوالے سے بدنام زمانہ بھارتی تحقیقاتی ادارے ”نیشنل انویسٹی گیشن ایجنسی“ (این آئی اے)نے بڈگام اور پلوامہ اضلاع میں آزادی پسند کارکنوں کے گھروں پر تازہ چھاپے مارے ہیں۔ ’این آئی اے“نے بھارتی فوجیوں اور پولیس اہلکاروں کے ہمراہ خانصاحب، کاکہ پورہ اور قصبہ یار کے علاقے مکمل طو ر پر سیل کر کے گھروں پر چھاپے مارے اور مکینوں کو ہراساں کیا اور گھریلو اشیاء کی توڑ پھوڑ کی۔ ادھر وادی کشمیر میں بدھ کو مسلسل 206ویں روز بھی بھارتی فوجی محاصرہ جاری اور مواصلاتی ذرائع معطل رہے۔ کل جماعتی حریت کانفرنس کے رہنما بلال صدیقی نے سرینگر سے جاری ایک بیان میں بھارتی قابض انتظامیہ کی طرف سے آزادی پسند رہنماؤں اور کارکنوں کی مسلسل گرفتار ی پر سخت رد عمل ظاہر کرتے ہوئے کہا ہے کہ بھارت نے مقبوضہ علاقے کو ایک بڑی جیل میں تبدیل کر دیا ہے۔ حریت رہنما محمد یوسف نقاش نے ایک بیان میں کہا کہ کشمیری تمام تر مشکلات کے باوجود اپنی جدوجہد جاری رکھیں گے۔ جموں وکشمیر اسلامی تنظیم آزادی نے سرینگر سے جاری ایک بیان میں مقبوضہ کشمیر اور بھارت کی

جیلوں میں غیر قانونی طور پر نظر بند کشمیریوں کی حالت زار پر تشویش ظاہر کی ہے۔ بیان میں کہا گیا کہ اسلامی تنظیم آزادی کے نظر بند چیئرمین عبدالصمد انقلابی متعدد امراض کا شکار ہیں اور انہیں مقررہ تاریخوں پر عدالت میں پیش نہیں کیا جا رہا۔ حریت آزادکشمیر شاخ کے رہنماؤں محمد فاروق رحمانی، زاہد اشرف اور اعجاز رحمانی نے اپنے بیانات میں اقوام متحدہ اور بڑی عالمی طاقتوں پر زور دیا کہ و ہ تنازعہ کشمیر کے کشمیریوں کی خواہشات کے مطابق حل کے لیے کردار ادا کریں۔

موضوعات:مقبوضہ کشمیر میں بھی فوجی اہلکاروں کی بڑی کارروائی