پیرس/تہران (این این آئی)ایرانی صدر حسن روحانی کے بعد وزیرخارجہ محمد جواد ظریف نے بھی یورپی ممالک پر زور دیا ہے کہ وہ جوہری معاہدے پرعمل درآمد کے حوالے سے اپنی ذمہ داریاں پوری کریں۔ اگر یورپ حرکت میں نہ آیا تو ایران معاہدے کی مزید شرائط سے دست بردار ہوجائے گا۔عرب ٹی وی کے مطابق ایک بیان میں جواد ظریف نے کہا کہ اگریورپی ممالک حرکت میں نہ آئے تو ایران معاہدے کی بعض شرائط سے دست بردار ہونے
پرمجبور ہوجائے گا۔ تاہم ان کا کہنا تھا کہ معاہدے کی شرائط پرعمل درآمد سے دست برداری کا مطلب یہ نہیں کہ مذاکرات ختم ہوجائیں گے۔ادھر اسی سیاق میں فرانس کے ایک سفارتی ذریعے کا کہنا تھاکہ اگر تہران نے جوہری معاہدے کی شرائط پرعمل درآمد میں کمی کا کوئی قدم اٹھایا تو ایران کو سخت پیغام دیا جائے گا۔ذرائع کا کہنا تھا کہ امریکا اور ایران کے درمیان کشیدگی کم کرنے کے لیے ہونے والے مذاکرات کی کوششوں میں اس طرح کے فیصلے مشکلات پیدا کریں گے۔
