صنعاء (این این آئی)یمن کے وزیراعظم معین عبدالملک نے کہا ہے کہ حکومت کی وفاداری میں فوج کے ساتھ باغیوں کے خلاف لڑنے والی تمام نجی عسکری تنظیموں کو باقاعدہ طور پرفوج میں شامل کرنے کا فیصلہ کیا گیا ہے۔عرب ٹی وی کے مطابق یمنی وزیراعظم معین عبدالملک نے ایک بیان میں کہا کہ صدرعبد ربہ منصور ھادی کے حکم کے تحت تمام نجی عسکری گروپوں کو نیشنل آرمی میں شامل کرنے کا فیصلہ کیا گیا ہے۔ اس منصوبے پر جلد ہی کام شروع کردیا جائے گا۔ اس کے ساتھ ساتھ شبوۃ
گورنری میں امن واستحکام کی بحالی اور شہریوں کی آباد کاری کے ایک جامع منصوبے پرجنگی بنیادوں پرکام شروع کیا گیا ہے۔میڈیا سے بات کرتے ہوئے معین عبدالملک نے کہا کہ ان کی جنگ ایرانی حمایت یافتہ حوثی باغیوں کے خلاف ہے۔ ان کا کہنا تھا کہ شبوۃ میں علیحدگی پسند انقلابی کونسل کی طرف سے بغاوت کی کوشش کے بعد حکومت نے خون خرابے بغیربات چیت کے ذریعے تمام مسائل کے حل کی مساعی کیں جس کے نتیجے میں انقلابی کونسل کوسرکاری تنصیبات سے نکال دیا گیا۔
