مکہ مکرمہ(سی پی پی)حج کے موقع پر بعض اوقات حج کے لیے آئی خواتین کے ہاں بچوں کی پیدائش ایک عام بات ہے۔ رواں سال بھی اب تک متعدد خواتین کے ہاں حج کے موقع پربچوں کی پیدائش کے واقعات سامنے آئے۔ سال 2019 کے حج سیزن میں پہلا بچہ ایک افغان خاتون کے ہاں مکہ مکرمہ کے چلڈرن اسپتال میں پیدا ہوا۔اس بچے کا نام محمد قاسم رکھا گیا ہے۔افغانستان سے تعلق
رکھنے والی 33 سالہ الحاجہ مریم النوری خوش قسمت ہیں کہ وہ فرئضہ حج کی ادائیگی کے ساتھ ساتھ حج ہی کے موقع پر ایک بچے کی ماں بھی بن گئی ہیں۔ پیدائش کے ساتھ ہی یہ بچہ بھی حاجی بن گیا۔سعودی وزارت صحت کے مطابق مریم نوری اور بچہ دونوں صحت مند اور مکمل تندرست ہیں۔ مریم نے بچے کی پیدائش پرسوشل میڈیا پر بھی اپنی خوشی کا اظہار کیا۔
