ریاض (این این آئی)سعودی عرب کے نائب وزیر دفاع شہزادہ خالد بن سلمان نے کہا ہیکہ ایرانی حمایت یافتہ یمن کی حوثی ملیشیا اخلاق وقانون کے دائروں سے ماورا ہوکر اپنے جرائم کا سلسلہ جاری رکھے ہوئے ہے۔ ان کا کہنا ہے کہ سعودی عرب کے ابھا شہر میں قائم بین الاقوامی ہوائی اڈے پر حوثیوں کا حملہ ایران کی طرف سے جارحیت میں اضافے کا ثبوت ہے۔شہزادہ خالد بن سلمان نے مائیکرو بلاگنگ ویب سائیٹ ٹویٹر پر

پوسٹ کی گئی متعدد ٹویٹس میں لکھا کہ سعودی عرب کے مفادات اور اس کی سلامتی کو نقصان پہنچانے والوں کو معاف نہیں کیا جائے گا بلکہ ان کے ساتھ سختی اور حوصلے کے ساتھ نمٹا جائے گا۔ انہوں نے کہا کہ حوثی ملیشیا کے جرائم ناقابل معافی نہیں۔ انہیں سعودی عرب پر حملوں کا حساب دینا ہوگا۔سعودی نائب وزیردفاع نے حوثیوں کے جرائم پر عالمی برادری کی خاموشی کو ہدف تنقید بنایا اور کہا کہ عالمی برادری کو حوثیوں کے خطرناک عزائم کی روک تھام کے لیے اپنی ذمہ داریاں پوری کرنا ہوں گی۔ ایرانی رجیم 40 سال سے خطے میں فساد پھیلا رہی ہے۔ خطے میں موت، افراتفری اور دہشت گردی ایرانی رجیم کی سازشوں کا نتیجہ ہے۔سعودی نائب وزیر دفاع نے کہا کہ یمن کے حوثی دہشت گردوں کے ساتھ کوئی نرمی نہیںبرتی جائے گی بلکہ ان کے ساتھ حوصلے اور سختی کے ساتھ نمٹا جائے گا۔ ان کا کہنا تھا کہ سعودی عرب کے ابھا شہرکے بین الاقوامی ہوائی اڈے پر راکٹ حملہ ایران کی خطے میں جارحیت میں اضافہ اور سعودی عرب کی سلامتی کو نقصان پہنچانے کی سازشوں کا حصہ ہے۔