اسلام آباد (این این آئی)امریکی نائب وزیر خارجہ ایلس ویلز (آج)منگل کو اسلام آباد میں پاکستانی حکام کے ساتھ افغانستان میں امن مذاکرات اور دوطرفہ امورپر بات چیت کرینگی ۔ سر کاری ذرائع نے ’’این این آئی ‘‘کوبتایا کہ وزارت خارجہ میں ہونے والے مذاکرات میں افغانستان سے متعلق حالیہ سفارتی کوششوں کے بارے میں گفتگو کی جائیگی ۔امریکی نائب وزیر خارجہ نے گزشتہ دو دنوں میں
افغانستان میں صدر اشرف غنی سمیت دیگر رہنماؤں کے ساتھ افغانستان کے مسئلے کے سیاسی حل سے متعلق تفصیلی مذاکرات کئے تھے ۔ایلس ویلز کا دورہ قطر میں طالبان اور امریکی حکام کے درمیان مذاکرات شروع ہونے کے بعد ہورہا ہے ۔طالبان اور امریکی کام کے درمیان گزشتہ تین ماہ میں دو ملاقاتیں ہوئی ہیں جس میں پہلی ملاقات ایلس ویلز کی سربراہی میں امریکی وفد اورطالبان کے درمیان قطر میں جولائی میں ہوئی تھی ۔دوسری ملاقات افغانستان کیلئے امریکہ کے خصوصی نمائندے زلمے خلیل زاد اور طالبان کے سیاسی نمائندوں کے درمیان اکتوبر کے پہلے ہفتے میں ہوئی جس میں باضابطہ مذاکرات شروع ہونے سے قبل اعتماد سازی کے اقدامات پر تفصیلی گفتگو ہوئی تھی ۔یہ چار ماہ میں ایلس ویلز کا پاکستان کا دوسرا دورہ ہے ٗاس سے پہلے دو جولائی کو اسلام آباد آئی تھیں جس میں انہوں نے قطر میں طالبان کے ساتھ ان کی ملاقات سے پہلے مشورے کئے تھے ۔ایلس ویلز کا دورہ افغانستان اور پاکستان ماسکو میں نو نومبر کو ہونے والی علاقائی ممالک کے مشاورتی اجلاس سے پہلے ہوا ہے ۔روسی حکام نے زلمے خلیل زاد کو بھی اس اجلاس میں شرکت کی دعوت دی ہے تاہم یہ معلوم نہیں کہ امریکہ اس میں شرکت کریگا ۔ یاد رہے کہ یہ اجلاس پہلے ستمبر میں ہونا تھا تاہم افغان حکومت کی جانب سے شرکت نہ کر نے کے اعلان کے بعد ملتوی کر دیا گیا اس سے پہلے امریکہ نے بھی اجلاس میں نہ جانے کا فیصلہ کیا تھا تاہم افغان حکام نے اعلان کیا ہے کہ امن کونسل کے اراکین ماسکو کے اس ہفتے ہونے والے مشاورت اجلا س میں شرکت کرینگے ۔
