نئی دہلی(آن لائن)بھارت کی ریاست جھاڑکنڈ میں لڑکی کے ریپ کے بارے میں گاؤں کے سردار کو مطلع کرنے پر لڑکی کو زندہ جلا دیا گیا۔گزشتہ روز ترجمان ضلعی پولیس کی جانب سے جاری کردہ بیان میں کہا گیا کہ ریاست جھاڑکنڈ میں لڑکی کے ریپ کے بارے میں گاؤں کے سردار کو مطلع کرنے پر لڑکی کو زندہ جلا دیا گیا،اس افسوس ناک واقعے میں ملوث ہونے کے الزام میں 14افراد کو حراست میں لیا گیا ہے،16 سالہ لڑکی کے والدین نے اپنی
بیٹی کا ریپ کیے جانے کی شکایت گاؤں کے سردار سے کی تھی،جس کے بعد جرگے نے ملزمان کو 100اٹھک بیٹھک کرنے اور 50 ہزار روپے جرمانے کی سزا سنائی تھی،سزا سننے کے بعد ملزمان غصے میں آ گئے اور انھوں نے متاثرہ لڑکی اور اس کے والدین کو مارنا پیٹنا شروع کر دیا۔اس کے بعد انھوں نے لڑکی کو آگ لگا دی۔ترجمان پولیس کے مطابق 2ملزمان نے والدین کو مارا پیٹا اور ان کے مکان کی جانب بڑھے جہاں انھوں نے اپنے ساتھیوں کیساتھ مل کر متاثرہ لڑکی کو آگ لگا دی۔ملزمان نے متاثرہ لڑکی کو اس کے گھر سے اس وقت اغوا کیا جب اس کے والدین شادی میں شرکت کیلئے گئے ہوئے تھے۔پولیس کے مطابق 2افراد نے گاؤں کے نزدیک جنگل میں اسے ریپ کیا۔جب لڑکی نے اس واقعے کے بارے میں اپنے والدین کو آگاہ کیا تو وہ اسے گاؤں کے سردار کے پاس لے گئے تاکہ ملزمان کو سزا دی جا سکے۔پولیس کے مطابق اس نے 14 افراد کو حراست میں لیا جن سے لڑکی کے ریپ اور قتل کے بارے میں تحقیقات کی جار رہی ہیں۔حملے میں ملوث ایک شخص تاحال لاپتہ ہے۔دوسری جانب جرگے کے اراکین کیخلاف غیر قانونی احکامات دینے پر کارروائی کی جا رہی ہے۔
