نئی دہلی(این این آئی)بھارت میں ایک شخص کو بدبودادجرابوں کے باعث لوگوں کو تکلیف پہنچانے پر گرفتار کرلیا گیا۔بھارتی اخبار کے مطابق بہار سے تعلق رکھنے والا ایک سیاح وولوو بس کے ذریعے دھرمشالا سے نئی دہلی جارہا تھا کہ بدبودار جرابوں کے باعث اس کی بس کے دیگر مسافروں سے مبینہ طور پر بحث مباحثہ ہوا۔جرابوں سے آنے والی بدبو اس قدر ناگوار تھی کہ مسافروں نے پرکاش کمار سے درخواست کی کہ وہ انہیں یا تو بیگ میں
ڈال لیں یا باہر پھینک دیں۔تاہم پراکاش کمار نے ایسا کرنے سے انکار کیا جس کے بعد ان کے اور دیگر مسافروں کے درمیان بحث و مباحثہ شروع ہوگیا۔بس کے ڈرائیور اور کنڈکٹر نے معاملے کے حل کی دو سے تین بار کوشش کی اور پراکاش کو جرابیں باہر پھینکنے کا کہا، لیکن نوجوان نے ان کی بات ماننے سے بھی انکار کردیا۔مسافروں نے پراکاش کے انکار پر بس ڈرائیور کو بس ضلع اونا کے بھروائین پولیس اسٹیشن لے جانے کا کہا اور وہاں پراکاش کمار کے خلاف شکایت درج کرائی۔پولیس نے پراکاش کے خلاف عوام کو پریشانی اور تکلیف پہنچانے کا مقدمہ درج کرکے گرفتار کیا۔تاہم بعد ازاں اسے سب ڈویڑنل مجسٹریٹ کی ضمانت پر رہا کردیا گیا۔سپرنٹنڈنٹ پولیس (ایس پی) اونا سجنیو گاندھی نے پراکاش کمار کے خلاف دیگر مسافروں کی شکایت پر مقدمہ درج ہونے کی تصدیق کی۔ان کا کہنا تھا کہ پراکاش نے پولیس اسٹیشن میں بھی جھگڑا کیا۔بعد ازاں پراکاش کمار نے دیگر مسافروں کے خلاف شکایت درج کرائی جس میں اس نے الزام لگایا کہ اس کی جرابوں سے بدبو نہیں آرہی تھی، لیکن اس کے باوجود مسافر اس سے بغیر کسی وجہ کے الجھے۔
