تہران(این این آئی)ایرانی صدر حسن روحانی نے اپنے امریکی ہم منصب براک اوباما سے مطالبہ کیا ہے کہ وہ کانگریس میں حال ہی میں ایران کے خلاف منظور کردہ پابندیوں میں توسیع کو مسترد کردیں اور اس قانون کی توثیق نہ کریں، اگر یہ پابندیاں عاید کی جاتی ہیں تو پھر ایران ان کا سخت جواب دے گا۔میڈیارپورٹس کے مطابق ایرانی صدر نے پارلیمان میں ایک تقریر میں امریکی کانگریس میں ایران پر پابندیوں کے ایکٹ (آئی ایس اے) کی مزید دس سال کے لیے توسیع کی منظوری کی مذمت کی ہے اور اس اقدام کو ایران اور چھے بڑی طاقتوں کے درمیان گذشتہ سال جولائی میں طے شدہ جوہری معاہدے کی صریح خلاف ورزی قرار دیا ہے۔حسن روحانی نے براہ راست نشری تقریر میں کہا کہ امریکا کے صدر اس قانون کی منظوری اور خاص طور پر اس کے نفاذ کو روکنے کے لیے اپنے اختیارات کو بروئے کار لانے کے مجاز ہیں لیکن اگر یہ ایک بڑی خلاف ورزی کی جاتی ہے تو ہم اس کا سخت جواب دیں گے۔درایں اثناء ایران کی سرکاری خبررساں ایجنسی کے مطابق پارلیمان کے 290 اراکین میں سے 264 نے ایک مشترکہ بیان جاری کیا ہے اور اس میں صدر حسن روحانی کی حکومت سے مطالبہ کیا کہ وہ یورینیم کی افزودگی سمیت جوہری پروگرام کی بحالی کے لیے جوابی اقدامات کرے۔ پارلیمان کے ارکان ایک بل کا مسودہ تیار کرکے جلد ایوان میں پیش کرنا چاہتے ہیں جس کے تحت امریکا کی جانب سے ایران پر عاید پابندیوں میں توسیع کے ردعمل میں تمام منجمد جوہری سرگرمیاں بحال کردی جائیں گی۔

موضوعات:امریکہ کی پابندیاں ایران صدر حسن روحانی