اسلا م آباد(نیوز ڈ یسک )بنگلہ دیش کے امورِ خارجہ کے مشیر محمد توحید حسین کا کہنا ہے کہ ڈھاکہ کے لیے تزویراتی اعتبار سے یہ امکان موجود ہے کہ وہ بھارت کو شامل کیے بغیر پاکستان کے ساتھ کسی علاقائی اتحاد کا حصہ بن سکے۔نجی ٹی وی دنیا نیوز کے مطابق ایک صحافی نے جب ان سے پوچھا کہ کیا بنگلہ دیش پاکستان کے ساتھ کسی علاقائی گروپ میں شامل ہو سکتا ہے تو انہوں نے جواب دیا کہ بنگلہ دیش یہ قدم اٹھانے کی پوزیشن رکھتا ہے، تاہم نیپال اور بھوٹان کے لیے بھارت کے بغیر ایسا کرنا ممکن نہیں ہوگا۔
تجزیہ کار ان کے اس بیان کو اسلام آباد کنکلیو میں وزیرِ خارجہ اسحاق ڈار کی حالیہ گفتگو کے جواب کے طور پر دیکھ رہے ہیں، جس میں انہوں نے دعویٰ کیا تھا کہ پاکستان، چین اور بنگلہ دیش پر مشتمل سہ فریقی تعاون کا عمل شروع ہو چکا ہے اور مستقبل میں دیگر علاقائی و عالمی ممالک کو بھی اس میں شامل کیا جا سکتا ہے۔
بنگلہ دیشی میڈیا کے مطابق توحید حسین نے کہا کہ وزیرِ خارجہ ڈار نے جو بات کی ہے، ممکن ہے اس پر کسی وقت پیش رفت ہو۔خیال رہے کہ اس سال اگست میں اسحاق ڈار نے 13 برس بعد بنگلہ دیش کا اہم دورہ کیا تھا، جس کے بعد وزیرِ اعظم شہباز شریف اور بنگلہ دیش کے چیف ایڈوائزر محمد یونس کے درمیان بھی خوشگوار ملاقاتیں ہوئیں۔گزشتہ سال اگست میں شیخ حسینہ واجد کی حکومت کے خاتمے کے بعد اسلام آباد اور ڈھاکہ کے تعلقات میں قربت بڑھی ہے، جب کہ اس دوران دہلی اور نئی بنگلہ دیشی قیادت کے درمیان فاصلے نمایاں ہوئے ہیں۔
