اسلام آباد (نیوز ڈیسک) بھارت میں ایک نوجوان اور پُرکشش خاتون پولیس افسر نے مبینہ طور پر ایک بااثر کاروباری شخص کو محبت کے نام پر اس طرح بے وقوف بنایا کہ وہ کروڑوں روپے سے محروم ہوگیا۔
بھارتی میڈیا رپورٹس کے مطابق یہ حیران کن واقعہ ریاست چھتیس گڑھ میں رونما ہوا جہاں ایک خاتون افسر نے پہلے بزنس مین سے قریبی تعلقات بنائے اور پھر اسی رشتے کو استعمال کرتے ہوئے اس سے بھاری مال و دولت حاصل کرلی۔
اطلاعات کے مطابق پولیس افسر نے کاروباری شخص دیپک ٹنڈن کا اعتماد جیتنے کے بعد اس سے قیمتی زیورات، بڑی نقد رقم، گاڑی اور رائے پور میں موجود اس کا ایک ہوٹل بھی اپنے نام منتقل کروا لیا۔
معاملہ اس وقت سامنے آیا جب خاتون افسر اچانک لاپتہ ہو گئی، جس پر پریشان بزنس مین نے تھانے میں درخواست دے کر انکشاف کیا کہ کلپنا ورما نامی ڈی ایس پی نے مبینہ طور پر اس سے تقریباً 2 کروڑ روپے سمیت ہیرے کی انگوٹھی، سونے کے زیورات اور دیگر قیمتی اشیا حاصل کیں۔
دوسری جانب ڈی ایس پی کلپنا ورما نے تمام الزامات کی سختی سے تردید کی ہے اور موقف اپنایا کہ یہ سب ایک کاروباری تنازع کا نتیجہ ہے اور انہیں غلط طریقے سے ہدف بنایا جا رہا ہے۔
پولیس نے شکایت وصول کر کے تفتیش شروع کر دی ہے تاہم ابھی تک اس سلسلے میں باضابطہ ایف آئی آر درج نہیں کی گئی۔
