نیویارک(این این آئی)اقوام متحدہ میں سعودی عرب کے مندوب عبد اللہ المْعلمی نے شامی بحران سے متعلق روسی قرارداد کے حق میں ووٹ دینے پر مصری مندوب کو تنقید کا نشانہ بنایا ہے۔میڈیارپورٹس کے ماطبق سلامتی کونسل میں روسی قرارداد کو صرف چار ارکان کی منظوری حاصل ہوسکی جن میں مصر بھی شامل ہے۔اس سے قبل شام سے ہی متعلق فرانس اور اسپین کی جانب سے پیش کردہ قرارداد کو 11 ارکان نے منظور کر لیا تھا تاہم روس نے ویٹو کا حق استعمال کرتے ہوئے اس کو سبوتاڑ کر ڈالا۔
سعودی عرب کی حکومت نے ایک بار پھرشام میں نہتے شہریوں کے قتل عام اور تباہی وبربادی کی شدید مذمت کرتے ہوئے شامی قوم کو کشت وخون سے نجات دلانے کا مطالبہ کیا ہے۔عرب ٹی وی کے مطابق ریاض میں منعقدہ سعودی فرمانروا شاہ سلمان کی زیرصدارت کابینہ کے اجلاس میں تمام عرب ممالک، مسلم دنیا اور عالمی برادری سے پرزور مطالبہ کیا گیا کہ وہ شام میں جاری قتل عام بند کرانے کے لیے یکساں اور ٹھوس موقف اپنائیں اور جنگ سے متاثرہ شامیوں تک امداد پہنچانے کے لیے مربوط کوششیں کریں۔ کابینہ کے اجلاس میں مطالبہ کیا گیا کہ شام میں جنگ سے متاثرہ شہریوں تک امداد پہنچانے کے لیے محفوظ زون اور حملوں سے محفوظ کوری ڈور قائم کیے جائیں تاکہ شامی رجیم کے ظلم کے ستائے شہریوں کو خوراک اور ادویات پہنچائی جا سکیں۔کابینہ کے اجلاس میں کہا گیا کہ مشرق وسطیٰ کے تمام ممالک کو عالمی توانائی ایجنسی کے اصولوں کے مطابق پرامن جوہری توانائی کے حصول اور اس کے استعمال کا حق حاصل ہے۔ اگر بین الاقوامی توانائی ایجنسی اپنی نگرانی میں کسی ملک کو پرامن جوہری تونائی کے استعمال کی اجازت دیتی ہے تو اس پرکسی کو اعتراض نہیں ہونا چاہیے۔ اجلاس میں شام میں کیمیائی ہتھیاروں کے استعمال کی جامع تحقیقات اور اسد رجیم پر جوہری ہتھیاروں کے حصول پر پابندیوں کا بھی مطالبہ کیا گیا۔اجلاس میں ’خلیج کی ڈھال 1‘ مشقوں کا بھی جائزہ لیا گیا اور ان مشقوں کے دوران سعودی فوج کی پیشہ وارانہ کار کردگی پر اطمینان کااظہار کیا گیا ہے۔
