اسلام آباد(مانیٹرنگ ڈیسک)جنوبی کوریا نے دھمکی دی ہے کہ اگر نیو کلیئر حملے کا خطرہ محسوس ہوا تو شمالی کوریا کو تباہ کر دینگے۔ پیانگ یانگ نے دھمکیوں کو مضحکہ خیز قرار دے دیا۔ جنوبی کوریا کے عسکری ذرائع کا کہنا ہے کہ اگر شمالی کوریا نے جوہری حملہ کرنے سوچا تو پیانگ یانگ کو مکمل طور تباہ کر دیا جائے گا۔ جن علاقوں میں شمالی کوریا کی عسکری قیادت ہونے کا امکان ہے، ان علاقوں کو خاص طور پر نشانہ بنایا جائے گا۔ برطانوی نشریاتی ادارے کی رپورٹ کے مطابق امریکہ سمیت اقوام متحدہ، جاپان اور جنوبی کوریا شمالی کوریا کے خلاف پابندیاں عائد کرنے کے بارے میں سوچ رہے ہیں۔ خیال رہے کہ شمالی کوریا نے حال ہی میں ایک جوہری تجربہ کیا تھا۔ شمالی کوریا کے حکام کا کہنا ہے کہ اس نے اب بیلسٹک راکٹوں پر جوہری ہتھیار نصب کرنے کی صلاحیت حاصل کر لی ہے۔

موضوعات:شمالی کوریا