کوئٹہ(ماین این آئی) افغانستان نے 125 پاکستانی مزدوروں کو تشدد کرنے بعد ملک سے بے دخل کردیا ہے۔ذرائع کے مطابق مزدوروں کو پاک افغان سرحدی علاقے چمن پر قائم دوستی گیٹ پر پاکستانی حکام کے حوالے کیا گیا۔افغانستان سے بے دخل کیے جانے والے پاکستانی مزدور صوبہ قندہار میں قیام پزیر تھے اور وہاں تعمیراتی شعبے سے وابستہ تھے۔نجی ٹی وی کے مطابق مزدوروں نے پاکستانی حکام کو بتایا کہ افغان فورسز نے انھیں گرفتار کرکے اور ملک سے بے دخل کرنے سے قبل تشدد کا نشانہ بنایا۔خیال رہے کہ افغان حکام نے پاکستانی مزدوروں کو ملک سے بے دخل کرنے کی وجہ نہیں بتائی۔ادھر پاکستانی فورسز نے کوئٹہ سمیت صوبہ بلوچستان کے مختلف علاقوں سے 328 افغان مہاجرین کو گرفتار کیا ہے۔ذرائع کے مطابق افغان مہاجرین کو فارن ایکٹ کے تحت گرفتار کیا گیا۔فرنٹیئر کور (ایف سی) کے ترجمان نے نجی ٹی وی کو بتایا کہ گرفتار کیے جانے والے افغان مہاجرین کو وفاقی تحقیقاتی ادارے (ایف آئی اے) کے حوالے کردیا گیا ہے جو تحقیقات کے بعد ان کو ملک سے بے دخل کریگی۔دوسری جانب افغان خبر رساں ادارے نے اپنی ایک رپورٹ میں دعویٰ کیا کہ افغانستان سے بے دخل کیے جانے والے پاکستانی مزدوروں کی تعداد 250 ہے۔رپورٹ میں کہا گیا کہ پاکستانی مزدوروں کو پاک افغان سرحدی علاقے چمن سے بے دخل کیا گیا، جو گذشتہ 10 روز سے بندش کا شکار ہے۔