مکہ مکرمہ (مانیٹرنگ ڈیسک) مسجد الحرام میں رش کو کم کرنے اور سیکیورٹی معاملات کی بہتری کے لئے نئے سمارٹ سسٹم نے تجرباتی طور پر کام شروع کر دیا۔ڈائریکٹوریٹ برائے حج اور عمرہ سیکیورٹی آپریشنز کے کرنل بدر بن سعود السعود کا کہنا ہے کہ جدید ترین’راصد’ سسٹم ام القراءیونیورسٹی کے تعاون سے تیار کروایا گیا ہے۔کرنل بدر نے مزید بتایا کہ یہ نظام حج اور عمرہ کی سیکیورٹی کے لئے کام کرنے والی سپیشل فورسز کی جانب سے مسجد الحرام میں رش کم کرنے کے لئے تیار کئے جانے والے حل اور الیکٹرانک سیکیورٹی کی سفارشات میں شامل تھا۔اس نئے سسٹم کی مدد سے ایک نیا الیکٹرانک پلیٹ فارم لگایا جارہا ہے جس پر 50 کیمروں کی مدد سے رش کی صورتحال دکھائی جائے گی۔اس نظام کو حج اور عمرہ کی سیکیورٹی کے اسسٹنٹ ڈائریکٹر میجر سعود الخالیاوی کی زیر نگرانی نافذ کیا جارہا ہے۔ اس کے علاوہ سپیشل فورسز برائے حج وعمرہ کے کمانڈر میجر محمد الشریف بھی اس منصوبے کی نگرانی کررہے ہیں۔ام القراءیونیورسٹی میں ریسرچ ٹیم کے سربراہ انس باسلمہ کا کہنا تھا کہ ‘راصد سسٹم ‘مسجد الحرام میں زائرین کی نقل وحرکت کو سبک رو بنائے گا جس سے رش کی صورتحال میں کافی حد تک کمی آئے گی۔