ابوظہبی(این این آئی)متحدہ عرب امارات میں امور خارجہ کے وزیر مملکت انور قرقاش نے دعویٰ کیا ہے کہ یمن میں القاعدہ کی دہشت گردی پر قابو پالیاگیا ہے ، یمن کی جنگ عملی طور پر اختتام پذیر ہوچکی ہے۔میڈیارپورٹس کیمطابق یمن کے بحران کے حوالے سے منعقد ایک لیکچر میں انہوں نے کہا کہ فوجی آپریشن “عزم کی آندھی” کے مقاصد یہ ، سیاسی عمل کی طرف واپسی، اقتدار کی آئینی حیثیت کی بحالی اور عرب امور میں ایرانی مداخلت کا جواب ہے،انور قرقاش نے باور کرایا کہ یمن کی جنگ ختم ہوچکی ہے اور بنیادی خدمات کی انتظامیہ کو قانونی حیثیت دینے اور ان کی کارکردگی بہتر بنانے کے لیے سیاسی نظم و نسق کا جائزہ مکمل ہوگیا ہے۔ اس کے علاوہ الاخوان المسلمین کی حمایت یافتہ القاعدہ تنظیم کی دہشت گردی پر بھی روک لگا دی گئی ہے جو ریاست کی رٹ نہ ہونے کا فائدہ اٹھا کر المکلا شہر میں دہشت گرد امارت کا قیام چاہ رہی تھی۔ المکلا میں مذکورہ عناصر کو ضرب لگانے کے لیے جو آپریشن کیا گیا اس کی نظیر بڑے ممالک میں بھی نہیں ملتی۔اماراتی وزیر نے زور دیا کہ فوجی مداخلت نے تمام مطلوبہ امور حاصل کرلیے اور اب صرف سیاسی کشیدگی باقی ہے جس کی ذمہ داری یمنیوں کے اپنے کاندھوں پر عائد ہوتی ہے۔