اسلام آباد (مانیٹرنگ ڈیسک) نجی ٹی وی رپورٹ کے مطابق اورلینڈومیں ہم جنس پرست کلب پر حملے کا ولن اگر عمر متین تھا تو اس کہانی کا ایک ہیرو بھی ہے اور وہ ہیرو بھی ایک مسلمان ہے، رپورٹ کے مطابق اورلینڈو کلب میں باؤنسر کی حیثیت سے کام کرنے والے ’’عمران یوسف ‘‘ نے سینکڑوں لوگوں کی جانیں بچائیں، عمران یوسف سابق امریکی میرین فوجی ہیں اور اس وقت وہ کلب میں باؤنسر کی نوکری کر رہے تھے کہ اچانک فائرنگ شروع ہو گئی، میوزک کی وجہ سے ساتھیوں نے یہی سمجھا کہ شاید فائرنگ کی آواز میوزک کا حصہ تھی لیکن عمران یوسف سابق فوجی ہونے کی وجہ سے فائرنگ کی آواز کو پہچان گئے اور بروقت لوگوں کی مدد کیلئے پہنچ گئے، اس وقت کلب کے عقبی دروازے پر لوگوں کا ایک ہجوم جمع تھا جو دروازہ باہر سے بند ہونے کی وجہ سے اسے کھولنے کی ناکام کوشش میں مصروف تھے، عمران یوسف نے کلب کے عقبی دروازے کو دھکے مار مار کر توڑ دیا اور لوگوں کو باہر نکالنا شروع کر دیا۔سوشل میڈیا ویب سائٹس پر عمران یوسف کو اس واقعے کا ہیرو قرار دیا جا رہا ہے۔ عمران یوسف کا کہنا ہے کہ انہوں نے کچھ خاص نہیں کیا البتہ بروقت ایک قدم اٹھا لیا تھا۔