دی ہیگ (این این آئی)ترکی اور یورپی یونین کے درمیان ویزا فری سفر کے لیے معاہدہ تعطل کا شکار ہوگیا ہے اور ترکی کے یورپی امور کے وزیر نے اعتراف کیا ہے کہ ان کے شہریوں کے یورپ کے ویزا فری فری سفر سے متعلق ڈیل یکم جولائی کی مقررہ ڈیڈ لائن تک پایہ تکمیل کو پہنچنے کا کوئی امکان نہیں ہے۔ترکی کے یورپی امور کے وزیر عمر چیلک نے نیدرلیڈز کے دورے کے موقع پر ڈچ نشریاتی ادارے این سے گفتگو کرتے ہوئے کہا کہ اگر ہم حقیقت پسند ہیں تو ہم اس تاریخ تک مقاصد حاصل نہیں کرسکیں گے۔تاہم ان کا کہنا تھا کہ ایسا جلد سے جلد ہونا چاہیے۔ترکی اور یورپی یونین کے درمیان شامی مہاجرین کی آبادکاری اور غیر قانونی تارکین وطن کی واپسی سے متعلق 18 مارچ کو ایک معاہدہ طے پایا تھا۔اس کے تحت ترکی کی علاقائی حدود سے تنظیم کے رکن ممالک میں غیر قانونی طور پر داخل ہونے والے شامیوں اور دوسرے افراد کو ترکی میں واپس بھیجا جائے گا۔اس کے بدلے میں ترک شہریوں کو اکتوبر 2016ء سے یورپی ممالک میں بغیر ویزا سفر کی اجازت ہوگی۔