لندن(مانیٹرنگ ڈیسک)برطانوی ولی عہد شہزادہ چارلس نے برطانوی فوج کے ایک مسلمان افسر نوید محمد کو Member of the Most Excellent Order of the British Empire کا اعزاز دیا ہے۔ انہیں یہ اعزاز برطانیہ میں مسلح افواج اور اقلیتوں کے درمیان تعلقات مضبوط بنانے کے لیے کام کرنے پر دیا گیا ۔میڈیارپورٹس کے مطابق بکنگھم پیلس میں منعقد تقریب کے بعد کیپٹن نوید کا کہنا تھا کہ میرے لیے یہ ایک بڑے اعزاز کی بات ہے کہ اس کام کو قابل تحسین جانا گیا جس کو میں کئی سالوں سے کررہا تھا۔ میں برطانیہ میں مخلتف کمیونٹیز بالخصوص برطانوی مسلمانوں میں ملک کی مسلح افواج کی تصویر بہتر بنانے کے لیے کام جاری رکھوں گا۔اس موقع پر برطانوی وزارت دفاع میں اسلامی امور کے مشیر امام عاصم حافظ نے جو سماجی سرگرمیوں میں کیپٹن نوید کے ہمراہ رہے ، ان کا کہنا تھا کہ مجھے بے انتہا فخر ہے کہ کیپٹن نوید محمد برطانوی مسلح افواج کے حوالے سے اعلی ترین معیار کے نفاذ کو برقرار رکھے ہوئے ہیں اور اس حوالے سے ان کی کوششوں کی قدر دانی کی گئی ہے۔امام عاصم نے کہاکہ مسلمان برطانوی معاشرے کا ایک انتہائی اہم جزو ہیں جہاں برطانیہ کی خدمت میں مسلمانوں نے بہت سی قربانیاں پیش کیں خواہ دونوں عالمی جنگوں کے دوران یا پھر ہمارے آج کے دور میں۔مشرق وسطی اور شمالی افریقہ میں برطانوی حکومت کے سرکاری ترجمان ایڈون سیموئیل کا کہنا تھاکہ برطانوی فوج میں مسلمان افسر کو شاہی سطح پر اعزاز سے نوازا جانا اس امر کی تصدیق کرتا ہے کہ برطانوی مسلمان معاشرے کا ایک مرکزی جزو ہیں اور عقائد کی آزادی برطانوی اقدار کا بنیادی حصہ ہیں۔