شکار پور۔۔۔۔۔۔۔ صوبہ سندھ کے شہر شکار پور کی ایک امام بارگاہ میں دھماکے کے نتیجے میں کم از کم 20 افراد ہلاک ہوگئے ہیں۔ شکارپور کے علاقے لکھی درکی ایک امام بارگاہ کربلا معلیٰ میں نماز جمعہ کی ادائیگی کے دوران بم دھماکا ہوا، جس کے دوران کم از کم 20 افراد ہلاک ہوگئے۔دھماکے کے بعد مسجد کی چھت بوسیدہ ہو کر نیچے آن گری جس کے نتیجے میں امدادی کارروائیوں میں مصروف متعدد افراد ملبے تلے دب گئے۔سول ہسپتال شکارپور کے میڈیکل سپرنٹنڈنٹ شوکت میمن نے دھماکے کے نتیجے میں 20 افراد کی ہلاکت اور 55 سے زائد افراد کے زخمی ہونے کی تصدیق کی ہے۔زخمیوں میں سے متعدد کی حالت تشویش ناک بتائی جارہی ہے، جنھیں چانڈکا میڈیکل ہسپتال لاڑکانہ منتقل کردیا گیا۔ایس ایس پی شکار پور ثاقب اسماعیل کے مطابق زخمیوں کو شکارپور کے مرکزی سول ہسپتال منتقل کیا گیا جبکہ سکھر، جیکب آباد اور نوابشاہ کے ہسپتالوں میں بھی ایمرجنسی نافذ کردی گئی۔