انٹرنیشنل کرکٹ میں چار سو سے زائد وکٹیں لینے والے سعید اجمل کے باؤلنگ ایکشن کا آفیشل ٹیسٹ مکمل ہو گیا ہے جس کی رپورٹ آئندہ ہفتے تک آنے کا امکان ہے۔

مشکوک باؤلنگ ایکشن کے سبب بین الاقوامی کرکٹ سے دور پاکستانی آف اسپنر سعید اجمل کے باؤلنگ ایکشن کا ٹیسٹ ہندوستانی شہر چنئی میں آئی سی سی کی منظورشدہ سری رام یونیورسٹی کی بائیو مکینک لیبارٹری میں لیاگیا۔

اجمل کے ٹیسٹ کی رپورٹ سات سے چودہ دن میں آنے کی امید ہے اور ٹیسٹ کلیئر ہونےکی صورت میں اسپنر پر کرکٹ کے بند دروازے دوبارہ کھل جائیں گے۔

لیکن اگر ستمبر 2016 سے پہلے ان کے ایکشن پر پھر سےانگلیاں اٹھیں توانہیں ایک سال کی پابندی کا سامنا کرنا پڑے گا۔

ٹیسٹ کرکٹ میں 178، ون ڈے انٹرنیشنل میں 183 اورٹی ٹوئنٹی میں 85 وکٹیں حاصل کرنے والے سعید اجمل کے باؤلنگ ایکشن پر گزشتہ سال اگست میں سری لنکا کے خلاف کھیلے گئے گال ٹیسٹ کے اختتام پر امپائرز کی جانب سے شک کا اظہار کیا گیا۔

امپائرز کی جانب سے شکوک کے اظہار کے بعد انہوں نے آسٹریلین شہر برسبین کے نیشنل کرکٹ سینٹر میں باؤلنگ ایکشن ٹیسٹ کرایا جو کلیئر نہ ہوا اور آئی سی سی نے ان پر پابندی عائد کر دی۔

رپورٹ کے مطالبق آف اسپنر کی تمام گیندوں میں مسائل موجود تھے اور ان کا بازو ہر گیند پر 40-45 ڈگری تک خم کھا رہا تھا جبکہ آئی سی سی کی جانب سے 15 ڈگری تک بازو کو خم دینے کی سہولت موجود ہے۔

یاد رہے کہ 36 سالہ سعید اجمل دوسری مرتبہ مشکوک بولنگ ایکشن کی زد میں آئے ہیں جہاں اس سےقبل 2009 میں بھی ان کے باؤلنگ ایکشن پر اعتراض ہوا تھا تاہم بعد میں وہ کلیئر ہوگئے تھے۔