جدہ …..تحریک انصاف کے چیئرمین عمران خان نے کہا ہے حکومت کمزور جوڈیشل کمیشن بنانا چاہتی ہے ، جوڈیشل کمیشن کے بننے تک اسمبلیوں میں نہیں جاسکتے ، بتایا جائے ہمارے استعفے قبول کیوں نہیں کئے جا رہے ۔ عمران خان نے عمرے کی ادائیگی کے بعد جدہ میں پریس کانفرنس کی ۔ ان کا کہنا تھا اگر میرٹ پر لوگوں کو لایا جاتا تو ملک میں پٹرول کا بحران نہ ہوتا ۔ تمام پارٹیاں کہتی ہیں پنجاب میں دھاندلی ہوئی ہے ، شریف اور زرداری خاندان کی کوالٹی یہ ہے کہ ان کے اثاثے بڑھ رہے ہیں جبکہ عوام غریب ہو رہے ہیں ، تحریک انصاف کے چیئرمین نے سابق چیف جسٹس افتخار چودھری کو بھی تنقید کا نشانہ بنایا ۔ عمران خان نے کہا تمام لوگ متفق تھے زرداری حکومت کرپٹ ہے لیکن موجودہ حکومت اس سے بھی زیادہ نا اہل ہے ۔ مسلم لیگ نون اور پیپلز پارٹی نے مک مکا کیا ہوا ہے ، تارکین وطن کے حوالے سے ان کا کہنا تھا حکومت انہیں سہولیات دے اور ان کے حقوق کا تحفظ کرے ، بھارت کے ساتھ ہمارے تعلقات پہلے سے بھی زیادہ خراب ہوگئے ہیں ، تحریک انصاف کے چیئرمین نے کہا ملک میں مضبوط جمہوریت کے لئے شفاف انتخابات آزاد میڈیا اور عدلیہ ضروری ہے ۔