اسلام آباد(دنیا نیوز)وزیر اعظم میاں محمد نواز شریف نے کہا ہے کہ قومی ایکشن پلان پر عملدرآمد کیلئے تمام وسائل بروئے کار لائے جائیں ، دہشت گردی کو جڑ سے اکھاڑنے کیلئے قیادت اور پوری قوم پرعزم ہے۔ دہشت گردوں کو چھپنے کی کوئی پناہ نہیں ملے گی۔ قومی ایکشن پلان پر عملدرآمد کے جائزے کیلئے وزیر اعظم نواز شریف کی زیرصدارت اعلیٰ سطح اجلاس ہوا جس میں ملکی سلامتی کی صورت حال اور دہشت گردی کے خلاف جاری کارروائیوں کا جائزہ لیا گیا۔ اجلاس میں دہشت گردی کے کیسز فوجی عدالتوں کو بھجوانے پر بھی غور کیا گیا۔ وزیر داخلہ چوہدری نثار نے ایکشن پلان کے بیس نکات پر عملدرآمد کے حوالے سے بریفنگ دی۔ اجلاس سے خطاب کرتے ہوئے وزیر اعظم نواز شریف نے کہا کہ ایکشن پلان پر عملدرآمد سے ہی دہشت گردی پر قابو پایا جا سکتا ہے۔ وزیر اعظم نے کہا قانون نافذ کرنیوالے اداروں کی استعداد کار بڑھانا ہماری اولین ترجیح ہے۔ اپنے مقاصد کے حصول کیلئے ہرممکن اقدامات کرینگے۔ وزیر اعطم نے ہدایت کی کہ پولیس میں تقرریاں و تبادلے میرٹ پر کئے جائیں۔ افغان مہاجرین کی رجسٹریشن کے عمل پر بھی تبادلہ خیال بھی ہوا۔ اجلاس میں وفاقی وزرا ، چاروں وزرائے اعلیٰ ، آرمی چیف جنرل راحیل شریف ، ڈی جی آئی ایس آئی لیفٹننٹ جنرل رضوان اختر سمیت اہم حکام نے شرکت کی۔