واشنگٹن۔۔۔۔۔ امریکی ٹی وی چینل فوکس نیوز نے برطانیہ کے شہر برمنگھم کو ’صرف مسلمانوں کے لیے شہر‘ کہنے پر براڈکاسٹ کے دوران معذرت کی ہے۔فرانس میں ہوئے شدت پسندوں کے حملے کے بعد امریکی تجزیہ کار سٹیو ایمرسن نے فوکس نیوز پر کہا تھا کہ برمنگھم ’صرف مسلمانوں کے لیے شہر‘ ہے جہاں غیر مسلم افراد نہیں جاتے۔ایمرسن نے اپنے اس بیان کی تصحیح اس وقت کی جب ذرائع ابلاغ نے ان سے رابطے کیے۔ہفتے کو فوکس نیوز نے اپنی نشریات کے دوران کہا کہ ’وہ اس غلطی پر معذرت خواہ ہیں اور برمنگھم کے لوگوں سے معافی مانگتے ہیں‘۔معذرت کرتے ہوئے پرزینٹر جنین پیرو نے کہا کہ ’شو پر آئے تجزیہ کار نے کئی غلطیاں کیں جس کو ہم نے صحیح کرنے کی کوشش نہیں کی‘۔’شو پر آئے تجزیہ کار نے کہا تھا کہ برطانیہ کا شہر برمنگھم مکمل طور پر مسلمان آبادی پر مشتمل ہے اور اس شہر میں غیر مسلم افراد نہیں جاتے۔ یہ دونوں بیانات غلط ہیں۔‘جنین نے مزید کہا کہ ’2011 کے اعداد و شمار کے مطابق برمنگھم کی 22 فیصد آبادی مسلمان ہے۔ ہمیں کوئی ایسے شواہد نہیں ملے کہ برمنگھم بظاہر نو گو ایریا ہے۔‘واضح رہے کہ ایمرسن کے اس بیان کے بعد سماجی رابطے کی ویب سائٹ ٹویٹر پر فوکس نیوز فیکٹس کا ہیش ٹیگ ٹرینڈ کیا اور لوگوں نے فوکس نیوز کا مذاق اڑایا۔