جوہانسبرگ : ویسٹ انڈیز نے ٹی ٹوئنٹی کی تاریخ کا سب سے بڑا ہدف حاصل کرتے ہوئے جنوبی افریقہ کو چار وکٹوں سے شکست دے دی۔

جوہانسبرگ میں کھیلے جانے والے سیریز کے دوسرے ٹی ٹوئنٹی میچ میں جنوبی افریقہ نے پہلے کھیلتے ہوئے مقررہ بیس اوورز میں سات وکٹوں کے نقصان پر 231 رنز بنائے جس میں کپتان فف ڈیوپلیسی نے 56 گیندوں پر 119 رنز کی برق رفتار اننگز کھیل کر نمایاں رہے اور انہوں نے ٹی ٹوئنٹی کی تاریخ کا چوتھا سب سے بڑا انفرادی اسکور بنانے کا اعزاز بھی اپنے نام کیا۔

مگر اس بظاہر ناممکن نظر آنے والے ہدف کے جواب میں ویسٹ انڈیز نے بیسویں اوور کی دوسری گیند پر چھ وکٹوں کے نقصان پر 236 رنز اسکور کرکے فتح اپنے نام کرلی اور ٹی ٹوئنٹی کی تاریخ میں سب سے بڑا ہدف حاصل کرنے کا ریکارڈ قائم کردیا۔

کرس گیل نے 41 گیندوں پر 90 رنز کی طوفانی اننگز کھیلی جس میں سات چھکے بھی شامل تھے جبکہ مارلن سیموئلز ساٹھ رنز کے ساتھ نمایاں رہے۔ان دونوں نے 152 رنز کی شراکت بھی قائم کی۔

کرس گیل اس وقت آﺅٹ ہوگئے جب ویسٹ انڈیز کو 38 گیندوں پر مزید 61 رنز درکار تھے تاہم کپتان ڈیرن سیمی نے 20 ویں اوور کی دوسری گیند پر چھکا لگا کر اپنی ٹیم کو ناقابل یقین فتح دلوا دی۔

اس کامیابی کے ساتھ ویسٹ انڈیز نے تین ٹی ٹوئنٹی میچز کی سیریز بھی دو صفر اپنے نام کرلی جبکہ فتح گر اننگ کھیلنے پر کرس گیل کو مین آف دی میچ قرار دیا گیا۔