اسلام آباد( جذبہ رپورٹ) اوورسیز پاکستانیوں کے لئے ایک اچھی خبر۔ پنجاب اسمبلی میں اوورسیز کمیشن کا قانون منظور کرلیا۔8اپریل کو پاکستان اوورسیز الائنس فورم یورپ اور پاکستان کمیونٹی ناروے کے زیر اہتمام رامادا ہوٹل اسلام آباد میں ایک کنونشن کا انعقاد ہوا تھا۔ جس میں 4وفاقی وزراء پرویز رشید‘ احسن اقبال‘ سردار محمد یوسف اور بلیغ الرحمن نے شرکت کی ۔ اس کنونشن میں سمندر پار پاکستانیوں کا چارٹر آف ڈیمانڈ پیش کیا گیا۔ پنجاب حکومت متحرک ہوئی ۔ پنجاب حکومت نے29اپریل کو لاہور میں ایک کنونشن کا انعقاد کیا۔ جس میں دنیا کے مختلف ممالک سے پانچ سو کے قریب سمندر پار پاکستانیوں کو اکٹھا کیا۔ وزیر اعلیٰ آفس میں ان کے اعزاز میں ایک لنچ اور گورنر ہاؤس میں ایک ڈنر کا اہتمام کیا گیا۔ انہیں سرکاری پروٹوکول سے نوازا گیا۔وزیر اعلیٰ پنجاب نے سمندر پار پاکستانیوں کے مسائل کے حل کے لئے ایک اوورسیز کمیشن کا اعلان کیااور 10نومبر کو اوورسیز کمیشن کے سلسلہ میں پنجاب اسمبلی نے قانون منظور کرلیا۔ وزیر اعلیٰ پنجاب اس کے چیئرمین ہوں گے ۔ سمندر پار پاکستانیوں میں سے ایک وائس چیئرمین نامزد کیا جائے گا۔ جبکہ آئی جی پنجاب ‘ چیف سیکرٹری پنجاب‘ اس کمیشن کے ممبر ہوں گے ۔ یہ کمیشن سمندر پار پاکستانیوں کے تمام مسائل حل کروانے کا ذمہ دار ہوگا۔ سمندر پار پاکستانیوں کو کسی محکمہ سے کوئی شکایت ہو۔ چاہے ان کے جائیدادوں پر قبضہ کرنے جیسے مسائل ہوں۔ یہ کمیشن ان مسائل کو حل کروانے کا ذمہ دار ہوگا۔ پنجاب حکومت نے اس کمیشن کے سلسلہ میں باقاعدہ قانون سازی کرلی ہے ۔ آئندہ آنے والی حکومتیں بھی اس کمیشن کے اغراض ومقاصد کو تبدیل نہیں کرسکیں گی۔