اسلام آباد۔۔۔۔ وزیراعظم کے مشیر برائے قومی سلامتی و امور خارجہ سرتاج عزیز کا کہنا ہے کہ پاکستان کو ہندوستانی حکومت کے ساتھ دو طرفہ مذاکرات کی بحالی کے سلسلے میں کسی پیش رفت کی توقع نہیں ہے۔
اسلام آباد کے پاک چائنا سینٹر میں منعقدہ پاکستان انسٹی ٹیوٹ آف ڈیولپمنٹ اکنامکس کی سالانہ کانفرنس کے افتتاح کے موقع پر میڈیا سے بات کرتے ہوئے سرتاج عزیز نے کہا کہ ‘ہندوستان نے مذاکرات منسوخ کیے تھے اور اب یہ اْس کی ذمہ داری ہے کہ وہ اس عمل کا دوبارہ آغاز کرے’۔انھوں نے مسئلہ کشمیر کے حوالے سے ہندوستان کے رویے پر افسوس کا اظہار کرتے ہوئے کہا کہ ہندوستان نے صرف دنیا کی توجہ اس مسئلے سے ہٹانے کے لیے کشمیرکو دہشت گردی سے جوڑا۔سرتاج عزیز کا کہنا تھا کہ گزشتہ چالیس برسوں سے کشمیر کے معاملے پر دو طرفہ تعلقات ناکام ہوتے آئے ہیں، یہی وجہ تھی کہ پاکستان نے اس معاملے میں عالمی برادری کو شامل کیا تھا۔انھوں نے کہا کہ ہندوستان سے دوستی صرف اْسی وقت ممکن ہے جب ہماری عزت نفس، وقار اور برابری پر سمجھوتہ نہ کیا جائے۔یاد رہے کہ ہندوستان میں پاکستانی ہائی کمشنر عبدالباسط نے اگست میں کشمیری حریت رہنما شبیر شاہ سے ملاقات کی تھی، جس کے بعد ہندوستان نے پاکستان کے ساتھ خارجہ سیکریٹری سطح کے مذاکرات منسوخ کر دیئے تھے۔