اسلام آباد(مانیٹرنگ ڈیسک)ملکی تاریخ میں ریکارڈ توڑ بزنس کرنے والے ڈرامے ’’میرے پاس تم ہو‘‘ میں مہوش کا کردار ادا کرنے والی اداکارہ عائزہ خان نے کہا ہے کہ ڈرامے کی آخری قسط دھماکے دار ہوگی اور ہمیشہ کیلئے آپ کے دل میں گھر کر جائے گی۔

دوسری جانب داکارہ حرا مانی نے ڈرامہ سیریل میرے پاس تم ہو کی آخری قسط کا اختتام بتا دیا۔ آج کل کے مقبول ڈرامے کی آخری قسط کے حوالے سے سوشل میڈیا تجزیہ کار اپنی قیمتی رائے کا اظہار کر رہے ہیں۔ کوئی کہہ رہا ہے کہ عائزہ مر جائے گی تو کچھ لوگوں کا کہنا ہے کہ ہمایوں سعید مر جائے گا۔ لیکن اس بار ڈرامے میں ٹیچر کا کردار ادا کرنے والی حرا مانی نے ڈرامے کی آخری قسط سے متعلق راز افشاں کردیا۔ حرا مانی کی ایک ویڈیو وائرل ہوئی ہے جس میں ان سے پوچھا جارہا ہے کہ ڈرامے کے اختتام میں کیا ہوگا ؟ جس پر حرا مانی کہتی ہیں کہ میں اس سوال سے تنگ آگئی ہوں تاہم ویڈیو بناتی خاتون کی جانب سے بار بار اصرار کئے جانے پر حرا مانی اچانک ہی بتا دیتی ہیں کہ ڈرامے کی آخری قسط میں سب مر جائیں گے۔ واضح رہے کہ ڈرامہ سیریل میرے پاس تم ہو کی آخری قسط آج شب ٹیلی ویژن اور سنیما گھروں میں 8 سے 10 بجے تک نشر کی جائے گی۔