کراچی(این این آئی)ترسیلات زر کی آمد میں کمی سے سپلائی متاثر ہونے کی بازگشت اور شرح سود گھٹنے سے معیشت میں طلب بڑھنے اور درآمدی نوعیت کی ڈیمانڈ کے باعث زرمبادلہ کی دونوں مارکیٹوں میں بھی ڈالر کی پیش قدمی جاری رہی۔انٹربینک مارکیٹ میں کاروبار کے ابتدائی دورانیے میں ڈالر تنزلی سے دوچار رہا، جس سے ایک موقع پر ڈالر کی قدر 10پیسے کی کمی سے 281 روپے 86پیسے کی سطح پر بھی آگئی تھی لیکن نئے درآمدی لیٹر آف کریڈٹس کھلنے کے دبا اور خام تیل کی عالمی قیمتوں میں اضافے کے رحجان سے اختتامی لمحات میں ڈالر کی پرواز شروع ہوئی۔
اس کے نتیجے میں کاروبار کے اختتام پر ڈالر کی قدر 10پیسے کے اضافے سے 282روپے 6 پیسے کی سطح پر بند ہوئی۔اوپن کرنسی مارکیٹ میں بھی بیرون ملک تعلیم حاصل کرنے والے طلبہ کی فیسوں، عازمین حج اور سیاحت پر جانے والے والے افراد کی ڈیمانڈ سے ڈالر کی قدر 15پیسے کے اضافے سے 284روپے 15پیسے کی سطح پر بند ہوئی۔
