اسلام آباد (نیوز ڈیسک)وفاقی حکومت نے ملک میں جائیداد کی خرید و فروخت پر نافذ فیڈرل ایکسائز ڈیوٹی (FED) کو ختم کرنے کا فیصلہ کر لیا ہے، جس پر بلڈرز اور ڈیولپرز نے حکومت کے اس اقدام کا خیرمقدم کیا ہے۔ایسوسی ایشن آف بلڈرز اینڈ ڈیولپرز آف پاکستان (آباد) کے چیئرمین حسن بخشی نے اس فیصلے پر حکومت کا شکریہ ادا کرتے ہوئے کہا کہ یہ قدم تعمیراتی شعبے کے فروغ کے لیے نہایت خوش آئند ہے۔حسن بخشی کا کہنا تھا کہ حکومت کو انکم ٹیکس آرڈیننس 2001 کے سیکشن 236C اور 236K میں عائد ٹیکسز کو بھی کم کرنا چاہیے، جبکہ رئیل اسٹیٹ پر 7E کے تحت لاگو ٹیکسز میں بھی نرمی لانے کی ضرورت ہے تاکہ سرمایہ کاروں کا اعتماد بحال ہو اور شعبہ مزید ترقی کرے۔

انہوں نے کہا کہ تعمیراتی صنعت ملک کی معیشت میں ریڑھ کی ہڈی کی حیثیت رکھتی ہے، اس شعبے کو چلانے کے لیے مربوط اور دور رس پالیسیوں کی ضرورت ہے جو روزگار کے مواقع پیدا کرنے کے ساتھ ساتھ معاشی ترقی کا ذریعہ بن سکیں۔مزید گفتگو کرتے ہوئے انہوں نے کہا کہ اگرچہ ٹاسک فورس نے معیشت کی بہتری کے لیے اہم تجاویز دی ہیں، لیکن اگر آئی ایم ایف ان پر اعتراض کرتا ہے تو وزیراعظم کو قومی مفاد میں ذاتی طور پر اس معاملے کو آگے بڑھانا چاہیے۔

ان کا کہنا تھا کہ علاقائی سطح پر معاشی مقابلے میں آگے بڑھنے کے لیے ضروری ہے کہ ملکی صنعت کو مراعات دی جائیں اور سرمایہ کاری کے لیے سازگار ماحول پیدا کیا جائے، تاکہ پاکستان عالمی منڈی میں مؤثر کردار ادا کر سکے۔