اسلام آباد (این این آئی)پاکستان اور عالمی مالیاتی ادارے (آئی ایم ایف) کے درمیان پالیسی سطح کے مذاکرات جاری ہیں، آئی ایم ایف نے بجلی کی قیمتوں میں بڑی کمی کا پلان مسترد کر دیا۔نجی ٹی وی کے مطابق ذرائع نے بتایا کہ حکومت نے بجلی کی قیمت میں 8 سے 10 روپے فی یونٹ کمی کرنے کی تجویز پیش کی، آئی ایم ایف نے حکومتی تجویز کو مسترد کر دیا۔
ذرائع کے مطابق آئی ایم ایف ہر شرط پر کیپٹو پاور پلانٹ کی گیس کی قیمت میں 23 فیصد اضافے کی خواہاں ہے، کیپٹو پاور پلانٹ کے لیے گیس پر لیوی بھی عائد کر دی گئی ہے۔ذرائع نے بتایا کہ آئی ایم ایف نے پالیسی لیول نے مذاکرات کے دوران ہی کیپٹو پاور پلانٹ کے گیس کے نوٹی فکیشن جاری کروائے، کیپٹو پاور پلانٹ کے لیے گیس کی قیمت 4ہزار 291 روپے فی ایم ایم بی ٹی یو کر دی گئی۔ذرائع کے مطابق موسمیاتی تبدیلیوں سے نمٹنے کے لیے ایک ارب ڈالر پر نئے شرط بھی سامنے آگئی، موسمیاتی تبدیلیوں کے قرض کے لیے حکومت کو کاربن لیوی عائد کرنا پڑے گی۔ذرائع کے مطابق پیٹرولیم مصنوعات پر کاربن لیوی عائد کرنے کی شرط رکھی گئی ہے، پالیسی سطح کی بات چیت کل بھی جاری رہے گی۔
