اسلام آباد (این این آئی) وفاقی وزیر برائے صنعت و پیداوار رانا تنویر حسین نے یوٹیلیٹی اسٹورز پر رمضان ریلیف پیکیج کا آغاز کردیا۔میڈیا سے گفتگو کرتے ہوئے وفاقی وزیر رانا تنویر حسین نے کہا کہ حکام کو سٹورز پر اشیا کی مقدار اور معیار یقینی بنانے کی ہدایت کردی ہے، یوٹیلیٹی سٹور پر رمضان ریلیف پیکیج عوام کو سہولت فراہم کرنے کیلئے علیحدہ اسکیم ہے، وزیراعظم نے گلگت بلتستان اور آزاد جموں و کشمیر سمیت ملک بھر کیلئے 20ارب روپے کے رمضان ریلیف پیکیج کا اعلان کیا ہے۔

رانا تنویر حسین نے کہا کہ یوٹیلٹی اسٹورز رمضان ریلیف پیکیج شروع ہوگیا ہے جو چاند رات تک جاری رہے گا، یوٹیلیٹی سٹورز کارپوریشن عوام کو مہنگائی سے بچانے کیلئے رمضان ریلیف پیکیج کا اجرا کر رہی ہے، یوٹیلٹی سٹورز کارپوریشن عوام کی سہولت کیلئے رمضان المبارک کے دوران 800سے زائد برانڈڈ اشیا پر 15فیصد تک رعایت دے گی۔وفاقی وزیر نے بتایا کہ عوام کی سہولت کے پیشِ نظر ملک بھر میں قائم یوٹیلٹی سٹورز کے کھلے رہنے کے اوقات بھی بڑھا دیے گئے ہیں، یوٹیلیٹی سٹورز صبح 9سے رات 10بجے تک کھلے رہیں گے۔