اسلام آباد (این این آئی)6 ماہ کے دوران پاکستان نے 31ملین ڈالر کے کینو اور دیگر کھٹے پھل ایکسپورٹ کیے، سب سے زیادہ 16ملین ڈالر سے زائد کے کینو افغانستان کو بھیجے گئے۔گزشتہ 6ماہ کے دوران ترش پھل بالخصوص کینو کی برآمدات سے متعلق تفصیلات قومی اسمبلی میں پیش کردی گئیں۔
وزیر تجارت جام کمال نے دستاویز پیش کیں جن میں بتایا گیا کہ جولائی تا دسمبر 2024 پاکستان نے 1لاکھ 5ہزار 690میٹرک ٹن کھٹے پھل برآمد کیے جن کی مالیت 30.9 ملین ڈالر بنتی ہے ۔دستاویز میں بتایا گیا کہ 16.72ملین ڈالر کے کھٹے پھل افغانستان بھیجے گئے، 3.90ملین ڈالر کے کھٹے پھل متحدہ عرب امارات بھیجے گئے، 3.30ملین ڈالر کے کھٹے پھل انڈونیشیا بھیجے گئے۔اسی طرح مزید بتایا گیا کہ برطانیہ، کینیڈا، اٹلی، نیدرلینڈ، پرتگال، سنگاپور اور بلجیم سمیت 25 ممالک نے کھٹے پھل پاکستان سے درآمد کیے۔
