کراچی(یوا ین پی )ترجمان پاکستان اسٹیل نے کہا ہے کہ پاکستان اسٹیل مل سوئی گیس کی بندش کی وجہ سے اس وقت غیر پیداواری حالت میں ہے موجودہ انتظامیہ ادارے میں بہترین صنعتی امن و امان اور معاملات کو حتی الامکان خوش اسلوبی سے چلانے کی کوشش کر رہی ہے۔ پاکستان اسٹیل میں تمام ریگولرافسران کی تنخواہوں کا پے اسکیل بورڈ آف ڈائریکٹرز سے منظور ہو کر وزارت پیداوار کے پاس مزید منظوری کے اگلے مراحل میں ہے اس لیے ابھی تنخواہوں میں اضافے یا ترقی بانٹنے کا سوال ہی پیدا نہیں ہوتا۔
پیداوار میں تعطل کی وجہ سے پاکستان اسٹیل کے بورڈ کے حالیہ منظور شدہ فیصلہ کے مطابق روز مرہ اخراجات کو کم کرنے کے لیے جنرل شفٹ کے ڈیوٹی ایام میں ایک دن کی عارضی طور پر کمی کی گئی ہے جبکہ شفٹ ملازمین اپنے شیڈول کے مطابق ڈیوٹی پر آتے رہیں گے۔انتظامیہ مجاز اتھارٹی سے اجازت کے بعد ہی تبادلوں کے ناگزیر فیصلہ کرتی ہے جو کہ تمام افسران کے ساتھ طے شدہ اپائنمنٹ لیٹر میں پہلے ہی درج ہے۔افسران کے تبادلوں کو انتقامی کارروائی اور کسی باہمی سیاست سے تشبیہہ دینا درست نہیں ہے ، اس لیے کسی قسم کے مقامی و غیر مقامی تعصب سے گریز کیا جا نا چاہیے۔
