لاہو ر( این این آئی) لاہور کی نجی کلینک میں ڈاکٹر نے مریضہ کو مبینہ زیادتی کا نشانہ بنا ڈالا اور فرار ہو گیا ، سی سی پی او لاہور نے واقعے کا نوٹس لیتے ہوئے ملزم کی فوری گرفتاری کا حکم دیدیا ،دوسری جانب 16سالہ لڑکے کے ساتھ بد فعلی کی کوشش کرنے والے ملزم کو گرفتار کر لیا گیا ۔ بتایا گیا ہے کہ وحدت کالونی میں واقع
نجی کلینک میں ڈاکٹر طاہر نے الٹراسائونڈ کے بہانے بلاکر مریضہ سے زیادتی کی ۔ملزم پولیس ٹیم کے پہنچنے سے پہلے فرار ہوگیا، متاثرہ مریضہ کی مدعیت میں مقدمہ درج کر کے ملزم کی تلاش شروع کر دی گئی ۔ پولیس نے کہا کہ متاثرہ خاتون کا میڈیکل کراکے تفتیش کے تقاضے پورے کیے جارہے ہیں ،ملزم کی گرفتاری کے بعد مزید حقائق سامنے آئیں گے ۔سی سی پی او لاہور بلال صدیق کمیانہ نے واقعے کا نوٹس لیتے ہوئے ایس پی اقبال ٹائون سے رپورٹ طلب کر لی اور زیادتی میں ملوث ملزم کی فوری گرفتاری کا حکم دیا ۔ انہوں نے کہا کہ خواتین کے ساتھ زیادتی ہراساں کرنے پر زیرو ٹالرنس ہے ۔زیادتی میں ملوث ملزم کو قرار واقعی سزا دلوائی جائے گی۔دوسری جانب ہربنس پورہ پولیس نے کمسن بچے کے ساتھ بد فعلی کی کوشش کرنے والا ملزم اویس اسلحہ سمیت گرفتار کرلیا ۔ ملزم نے بچے کو نوکری کا جھانسا دے کر اپنے گھر لے جا کر بد فعلی کی کوشش کی،لڑکے کو دھمکیاں دی اور اسلحہ سے ڈرایا، ملزم سے پسٹل اور گولیاں برآمد کر کے مقدمہ درج کر لیا گیا ۔دوسری جانب نگران وزیراعلیٰ پنجاب محسن نقوی نے وحدت کالونی کے ہسپتال میں ڈاکٹر کی مریضہ سے مبینہ زیادتی کے واقعہ کا نوٹس لیتے ہوئے سی سی پی او لاہور سے رپورٹ طلب کرلی ہے۔ وزیراعلیٰ محسن نقوی نے ہدایت کی کہ واقعہ میں ملوث ملزم کی جلد گرفتاری یقینی بنائی جائے اورملزم کو قرار واقعی سزا دلائی جائے۔ متاثرہ لڑکی کو انصاف کی فراہمی یقینی بنائی جائے۔انہوں نے کہاکہ ملزم قانون کے تحت سخت سزا کا حق دار ہے۔ ہسپتال میں مریضہ سے زیادتی کا واقعہ ناقابل برداشت ہے۔
