کراچی (این این آئی)قومی کرکٹ ٹیم کے وکٹ کیپر بیٹر سرفراز احمد کی جانب سے اپنے ہوم گراؤنڈ پر بنائی جانے والی شاندار سنچری پر ان کی والدہ کا ویڈیو بیان سامنے آیا ہے جس میں وہ اپنے جذبات پر قابو نہ رکھ سکیں۔کرکٹر کی والدہ نے کہا کہ میرے لئے خوشی کا دن ہے، مجھے بہت اچھا لگا، سرفراز نے بہت اچھی پرفارمنس دکھائی، وہ اپنے ملک کیلئے کھیلا اور انشاء اللہ کھیلتا رہے گا، اللہ نے چاہا تو اسے اور کامیابی ملے گی۔سرفراز احمد کی والدہ نے کہا کہ مجھے رات سے نیند نہیں آرہی تھی، میں رات سے جاگ رہی تھی، سارا دن اور ساری رات اس کیلئے دعائیں کیں کہ اللہ وہ سنچری بنالے، بہت بے چینی تھی۔سابق کپتان کی والدہ کے مطابق ان چار سالوں میں وہ کبھی ہمت نہیں ہارا، وہ ایک لفظ نہیں بولا، نا ہی اس نے کبھی کسی کیلئے برا کہا، میرا بچہ بہت صبر والا ہے۔