اسلام آباد (این این آئی)پاکستان تحریک انصاف نے اسلام آباد میں بلدیاتی انتخاب نہ ہونے پر الیکشن کمیشن کو توہین عدالت کا مرتکب قرار دیدیا۔تفصیلات کے مطابق اسلام آباد ہائی کورٹ نے 30 دسمبر کو الیکشن کمیشن کو حکم دیا تھا کہ شیڈول کے مطابق وفاقی دارالحکومت کی 101یونین کونسلز پر ہفتے 31 دسمبر کو ہی پولنگ کرائی جائے۔

الیکشن کمیشن عدالتی حکم پر عمل درآمد نہ کراسکا، جس کی وجہ سے وفاقی دارالحکومت میں ہفتے کے روز پولنگ نہ ہوسکی۔تحریک انصاف نے اسلام آباد میں بلدیاتی انتخاب نہ ہونے پر الیکشن کمیشن کو توہین عدالت کا مرتکب قرار دے دیا ہے۔میڈیا سے بات کرتے پوئے پی ٹی آئی کے سیکرٹری جنرل اسد عمر نے کہا کہ پولنگ اسٹیشنز کے باہر ووٹرز موجود تاہم الیکشن کمیشن غائب رہا۔پی ٹی آئی رہنما نے کہا کہ الیکشن کمیشن ایسا کرکے توہین عدالت کا مرتکب قرار ہوا ہے، اس کے خلاف سخت کارروائی کی جائے۔اسد عمر نے کہا کہ وفاقی حکومت عوام سے خوف زدہ ہے، جہاں الیکشن ہوتا ہے وہاں سے بہانے بنا کر بھاگنے کی کوشش کرتے ہیں۔سابق وفاقی وزیر نے کہا کہ حکومت کو چیلنج کرتا ہوں، پی ٹی آئی کے ووٹرز میدان میں ہیں، آؤ اور ان کا مقابلہ کرو۔اس سے قبل اپنی ٹوئٹ میں اسد عمر نے کہا کہ یہ امپورٹڈ حکومت جو نظام بنانے کی کوشش کر رہی ہے، جس میں جمہوریت ہو اور کوئی الیکشن نہ ہو، کہیں ان کو اور قوم کو مہنگا نہ پڑ جائے۔اسد عمر نے کہا کہ تحریک انصاف اسلام آباد کی ٹیمیں الیکشن کے لئے گراونڈ پر موجودتاہم ہائی کورٹ کے فیصلے کے باوجود الیکشن کمیشن کا عملہ غائب رہا، یہ حکومت جمہوریت کا جنازہ نکال رہی ہے۔