اسلام آباد (این این آئی)وفاقی وزیر داخلہ رانا ثناء اللہ نے کہا ہے کہ عدالت کا حکم سر آنکھوں پر مگر قابل عمل نہیں، (آج)ہفتہ کو اسلام آباد میں بلدیاتی الیکشن کروانا ممکن نہیں ہے۔ایک انٹرویو میں رانا ثنا ء اللہ نے کہا کہ اسلام آباد میں بلدیاتی الیکشن کیلئے

4 سے5 ماہ لگیں گے، جنرل الیکشن کیلئے تو 8 سے 10 ماہ چاہئیں، 1 ہزار پولنگ اسٹیشنز کیلئے انتظامات کم وقت میں نہیں ہوسکتے۔رانا ثنا ء اللہ نے کہا کہ اسلام آباد میں پہلے ہی حملہ ہو چکا ہے، ابھی بھی سیکیورٹی خدشات ہیں، الیکشن کمیشن اپنے طور پر اپیل دائر کرنے کا مجاز ہے، ہم اسلام آباد ہائیکورٹ کے فیصلے پر اپیل دائر کریں گے۔وزیر داخلہ نے کہا کہ (آج)ہفتہ کوالیکشن کروانا نہ الیکشن کمیشن کیلئے ممکن ہے نہ ہمارے لیے، اسلام آباد میں پہلے ہی تھریٹ الرٹ ہے، کچھ دن پہلے حملہ ہوچکا ہے۔انہوں نے کہا کہ سفارت کار جس قسم کی سیکیورٹی خدشات کا اظہار کر رہے ہیں ایسا کوئی معاملہ نہیں۔ رانا ثناء اللہ نے کہا کہ الیکشن میں ہزاروں لوگ اکٹھے ہوتے ہیں دہشت گرد ایسی صورتحال سے فائدہ اٹھاتے ہیں۔